O Xornal do Val Miñor. Baiona, Nigrán, Gondomar

O Concello de Gondomar continúa coas actividades culturais para a época estival. Desde a Concellaría de Cultura se programa para este venres, día 9, outra noite na Praza da Alameda con Virandeira en concerto ás 22.30 horas. Tonhito de Poi será o encargado de poñer punto e final á noite, co seu último disco O soro da verdade.
O sábado 10, ás 22.30 horas, A Roda visitará Gondomar con Na Memoria.
Como cada domingo, a Praza Paradela acollerá, desde as 12.30 horas, a actuación da Banda de Gaitas Balcón do Val Miñor xunto ao grupo Ecos e Agarimos.

Trinta e tres obras participarán no 2013 da VI edición do Premio de Poesía Victoriano Taibo - Entidade Menor Local de Morgadáns, organizado polo Instituto de Estudos Miñoranos.

O pasado 31 de xullo  rematou o prazo para a recepción de orixinais para participar no V Premio de Poesía Victoriano Taibo – Entidade Local de Morgadáns. O xurado reuniuse para recoller os traballos presentados, nun total de trinta e tres obras. O fallo farase público nos primeiros días de setembro, en data que se anunciará nos medios de comunicación.

A Asociación de Medios en Galego da que forma parte impulsora Valminor.info, abordou a situación do sector en sendas xuntanzas coa Secretaría Xeral de Política Lingüística e a Secretaría Xeral de Medios.

A Asociación de Medios en Galego (AMEGA) comeza a dar pasos en firme para mellorar e regularizar a situación daqueles xornais, radios, televisións ou webs que apostan polo galego como vía de comunicación. Con este obxectivo varios membros deste colectivo entrevistaronse coa secretaria xeral de Medios, Mar Sánchez, e co secretario xeral de Política Lingüística, Valentín García. Ambos os dous comprometeronse a traballar conxuntamente coa AMEGA para potenciar a situación dos medios en galego.

Oito días naturais de prazo terán para preparar as ofertas e a documentación requirida as empresas que desexen participar da licitación que con carácter "urxente" saca a concurso o Concello de Gondomar, para o servizo de catering e de persoal monitor dos comedores escolares dos centros de ensino primario do concello.

O Boletín Oficial da Provincia anuncia a convocatoria de aspirantes para ocupar o cargo de xuíz de paz do concello de Baiona por un período de catro anos. Os interesados terán un prazo de 15 días para presentar a documentación requirida e optar á praza.
As bases, aprobadas o pasado 9 xullo pola alcaldía, poden ser consultadas no BOP de Pontevedra ou en dependencias do Concello de Baiona.

Continúan as Xeiras 2013 que organiza o Instituto de Estudos Miñoranos. Esta semana, coa colaboración da Agrupación Astronómica Rías Baixas, para unha "Noite de estrelas e lobos" na Chan da Lagoa na Serra da Groba (Baiona).
Visitarase un vello foxo de lobos e, coa axuda dos asistentes, darase caza ao espírito do lobo que metía medo aos vellos habitantes e gando da nosa Serra da Groba. Cando pase o susto haberá tempo para que un membro da Asociación Astronómica Rías Baixas –con permiso da climatoloxía- amose o ceo de verán, no marco da previa ás históricas Bagoas de San Lourenzo (Perseidas).

O Instituto de Estudos Miñoranos abre inscricións para interesados en participar dun Curso de Creación Literaria (poesía e prosa) que dirixirá a escritora Elvira Riveiro. O mesmo se desenvolverá en oito sesións os días xoves de 18:30 a 19:30 horas na Aula de Cultura Ponte de Rosas, situada na Avenida da Feira, número 10, baixo (Gondomar).

O Centro Cultural e Deportivo Bolos da Carrasca celebra esta semana a súa vixésima Semana Cultural, coa programación de actuacións de música e baile tradicional todos os días da semana. A primeira actuación será este martes a partir das 22.00 horas, e correrá a cargo do Grupo de Acordeóns Mascarenhas de A Guarda e o coro local Ecos do Castelo.