A máis dun hosteleiro caironselle os pratos cando viu o montante da taxa pola recollida do lixo emitida nestes días dende o Concello de Nigrán.  A administración local efectuou unha actualización dos importes que nalgúns casos incrementou os recibos nun 80% co respecto ao 2013. Pequenos locais que non chegaban a pagar 250€ recibiron facturas de ata 400€, segundo denunciou o PSOE na tarde deste martes. O alcalde Alberto Valverde (PP) deféndese e afirma que non alterou o valor da taxa senón que o Concello fixo unha actualización do padrón municipal e das medidas dos locais. Afirmación esta que desmenten desde filas socialistas pois aseguran que non tivo lugar ningún tipo de inspección. O rexedor anuncia unha convocatoria para aclarar o tema cos empresarios e revisar cada caso para contrastar se as variacións son axeitadas á realidade de cada local . Agrega que esta modificación non afecta ás vivendas unifamiliares, ainda que esta afirmación ven con trampa xa que este ano si que se verán afectados cunha suba do 3% dado que o pago é a ano vencido. A conxelación dos impostos non será efectiva até 2015.

O Concello de Nigrán, a través da Concellería de Promoción Empresarial, Emprego e Comercio do Concello de Nigrán, ten prevista a realización no mes de febreiro dun curso de "Iniciación á informática", dirixido prioritariamente a todas as persoas desempregadas e empadroadas no no municipio que queiran adquirir coñecementos nesta área.
Este curso, que se impartirá nas instalacións municipais do Centro Antena Municipal (Rúa Otero Pedrayo, nº 52), se desenvolverá do 3 ao 24 de febreiro, durante os luns, mércores e venres, en horario de 10.00 a 13.00 horas, estando aberto o prazo de inscricións do 20 ao 29 de xaneiro.

O Concello de Nigrán informa que quedan seis prazas libres para o curso "Deseño, planificación e desenvolvemento de actividades de lecer e tempo libre", organizado pola concellería de Patrimonio, Igualdade e Xuventude en colaboración coa Deputación de Pontevedra.

O Concello de Nigrán ofrece, en colaboración co Centro Cultural das Angustias un taller de cestaría. O curso impartirase no local social da asociación os días venres en horario de 17.00 a 19.00 horas, desde o 24 de xaneiro e cunha duración dun mes. As inscricións abriranse o luns 13 de xaneiro, e poderán formalizarse no CIM, na antiga estación do tranvía de Panxón, Estrada pola Vía, número 65, no teléfono 986 383 081 ou a través do correo electrónico Este enderezo de correo-e está a ser protexido de robots spamers, precisas activar o JavaScript para velo .

-Veciño de Nigrán obtén a devolución de 250 mil euros colocados en participacións preferentes polo Banco Santander.
-A sentenza engade o pago dos intereses correspondentes e os custes dun xuízo anterior elevando a suma a 300 mil euros.

-O BNG reclama ao alcalde de Gondomar que trate no Pleno unha moción que garanta o subministro enerxético ás familias que estean en situación de pobreza.  Os nacionalistas esixen un acto de sensibilidade cando medra o número de familias que carecen deste servizo pola imposibilidade de facer fronte ao pago das facturas da luz.

Coa recollida de máis de 150 quilos de alimentos no Centro Cultural de Mañufe, a Concellería de Benestar Social de Gondomar salienta o labor veciñal no fornecemento do banco de alimentos municipal. Patricia Durán, concelleira responsable, agradeceu as achegas que nesta materia fixeron tamén a escola infantil Galiña Azul, o Centro Cultural de Borreiros, o mercadiño das mulleres de Borreiros e os máis de 400 Papá Noeles moteros que visitaron Gondomar o pasado día  22.

A Asociación Ecoloxista A Groba organiza no Centro Neural de Gondomar, no Campo das Cercas o seu primeiro curso de iniciación á agricultura ecolóxica para pequenas hortas. Durante oito sesións os monitores Luis Lameiro e Xoán Carlos Vilariño desenvolverán un programa formativo que abrangue dende introdución á agricultura ecolóxica, as ferramentas básicas, os tipos de bancais, cultivos, control de malas herbas, etc.