O vindeiro sábado 23 de agosto, ás 20 horas, o Centro Cultural de Peitieiros, Gondomar, celebra o XXI Festival Folclórico Internacional. Como xa se fixo o ano pasado, como actividade previa ao Festival Folclórico, celébrase a Semana Cultural que comezará o martes 19.

Corenta e nove obras participarán no 2014 da VII edición do Premio de Poesía Victoriano Taibo - Entidade Menor Local de Morgadáns, organizado polo Instituto de Estudos Miñoranos. Cantidade que fai desta edición a de maior participación de orixinais dende a creación do certame no ano 2008.

Cópera Prima titúlase a nova web serie que tratará temáticas relativas á mocidade e terá o Val Miñor como principal escenario. Os seus fornecedores son un grupo de mozas e mozos estudantes da EAV de Vigo, a maioría deles residentes en Gondomar. Tras presentar este proxecto no concurso do programa Iniciativa Xove da Xunta de Galicia, acadaron un apoio económico para producir o primeiro capítulo piloto que se espera, poda ser estreado no vindeiro mes de outubro. O mesmo contará cunha xira polos campus universitarios de Vigo, Santiago, Pontevedra e A Coruña; antes do seu ingreso nas redes. VM.info falou cos promotores da serie para coñecer detalles do traballo.

Un traballo de conservación e estudo do castro de Chavela (Oia) dará comezo esta semana por parte da Comunidade de Montes de Santa María de Oia e co apoio da Asociación Cultural Amigos do Mosteiro de Oia. Os colectivos desenvolverán unha medición do xacemento co obxectivo de coñecer as súas dimensións. Tamén se practicarán traballos de limpeza e mantemento para facilitar o acceso e mellor goce do xacemento por parte dos visitantes. Os promotores da intervención informan que contan cos preceptivos permisos da Dirección de Patrimonio da Xunta de Galicia