O paseo marítimo de Panxón acollerá durante todo o sábado unha feira de antigüidades organizada polo Concello de Nigrán.

Dende o Concello sinalan que se decidiu repetir o evento "despois do éxito que tivo a que se organizou en xullo na alameda de San Campio, na Ramallosa".

Continúan as Xeiras 2015 que organiza o Instituto de Estudos Miñoranos. Esta venres 14 de agosto, coa colaboración da Agrupación Astronómica Rías Baixas, para unha "Noite de estrelas e lobos" na Chan da Lagoa na Serra da Groba (Baiona). O punto de encontro será no merendeiro de Chan da Lagoa ás 20 horas. Non é necesaria a inscrición previa.

A andaina dará comezo ás últimas horas da tarde e as primeiras da noite polos cumios da Serra da Groba, unha das principais barreiras orográficas máis altas de Galicia á beira do mar. Faranse paradas en tres sitios distintos. Dende A Poza Negra rumbo A Chan da Gabiñeira e dende O Alto do Campo de Lobo se mirará A Boca da Groba onde falarase de hidronimia e lindeiros administrativos.

O Concello de Nigrán programa dende mañá venres ao domingo a quinta edición do festival Novo Circo con catro actuacións en diferentes ubicacións. Pallasos, acróbatas, trapecistas e malabaristas de recoñecido prestixio se darán cita no municipio nunha primeira representación o venres ás 20,30 horas no paseo de Panxón, o sábado con dobre sesión en Panxón (20,30) e na Praza do Concello (23,00 horas) e, finalmente, o domingo en Praia América (xunto a escola de vela). Trátase dun espectáculo familiar e para disfrutar de xeito distendido, por iso se recomenda aos asistentes acudir con coxíns ou toallas para sentarse directamente no chan.

A Asociación Veciñal Castro e Ladeira organiza o vindeiro sábado 5 de setembro un festival solidario co Banco de Alimentos de Vigo. O acto terá lugar no Mercado de Sabarís e constará dun espectáculo coa participación do Payaso Popin e a seguir o grupo Algarada.