O Pleno extraordinario desenvolvido esta mañá en Gondomar, non arroxou luz sobre a futura aprobación inicial do Plan Xeral de Ordenamento Territorial. Segundo o informe da alcaldía os técnicos municipais e o equipo de redacción ten aínda que solucionar aspectos legais que fan imposible a súa inmediata posta a discusión pola corporación. En canto á situación urbanística do concello, dos 180 núcleos rurais existentes, só se podería edificar en 19 previo estudo de que non se atopen saturados.

A Asociación Galega de Xestores Deportivos agasallou ao Concello de Gondomar durante os II PREMIOS GALICIA Á XESTION DEPORTIVA. A gala tivo lugar no Salón do Club do Mar de San Amaro, na Coruña, o pasado venres 21 de outubro. A AGAXEDE salientou o desenvolvemento da Concellería de Deportes durante os últimos anos, no municipio.

O Centro Democratico Liberal de Gondomar inaugurou sede na Rúa Elduayen, na planta baixa do mesmo edificio que ocupara o grupo independente Move Gondomar, do ex concelleiro Manuel Núñez Sestelo. Rodeados de amigos e simpatizantes, os concelleiros Natalia Salgueiro e mais Ignacio Troncoso, celebraron a apertura deste espazo ao que definiron como “Una casa abierta a todos los gondomareños”.

-O BNG critica ao alcalde popular Fernando Guitián por citar o pleno extraordinario sobre urbanismo para o vindeiro luns 24 de outubro, último día do prazo legal.

-Tamén cuestiona a través do seu voceiro Pauliño Del Río, que se fixou para as 9 da mañá, restando a posibilidade de que moitos veciños poidan estar presentes.

O portavoz nacional do BNG Guillerme Vázquez participará nun encontro multisectorial o vindeiro venres 21 de outubro, ás 20:30 horas na Casa da Cultura de Gondomar. Para o acto, co que o BNG inicia a precampaña en Gondomar cara o 20-N, foron convidadas 78 asociacións locais de diversas actividades sociais. Os organizadores teñen por obxectivo "coñecer de primeira man a opinión dos axentes máis activos da sociedade que estas entidades representan". Na xuntanza tamén participará a deputada no Congreso, Olaia Fernández Dávila, cabeza de lista do BNG por Pontevedra.

Se unha persoa utilizou o galego como principal ou única lingua, por que ao morrer a súa lápida está en castelán? Este paradoxo non estará dalgún xeito trastornando a súa memoria? Para o vogal do BNG en Morgadáns, Xaime Lugilde, moitas veces escríbense as lápidas nun idioma que o falecido non usou e seica, tampouco coñecía. En base a esta reflexión, Lugilde proporá ao pleno da Entidade Menor Local de Morgadáns que poña en práctica unha serie de medidas de cara ao próximo Día de Defuntos que fagan xustiza coa memoria dos mesmos, incentivando o uso do galego nas inscricións das lápidas.

Veciños das parroquias de Vincios, Peitieiros, Chaín, Morgadáns e Couso fixeron unha concentración esta tarde en protesta pola falla de seguridade peonil que afecta a estrada PO-341 (Vincios - Couso). Os afectados denuncian que pese ás promesas da Consellería de Medio Ambiente, Territorio e Infraestruturas, a obra a piques de rematar, restou beiravías, e colocou valados metálicos nas curvas que fan imposible o tránsito de peóns. Dende a Xunta informáronlles que a ampliación de sendas peonís necesitan da cesión de terreos que deben xestionar ante o Concello de Gondomar. Os viandantes, que afirman que iso non é así por tratarse dunha estrada autonómica, pediron igualmente a devandita cita ao municipio a que foi concedida para o vindeiro 31 de outubro.

A Consellería de Medio Rural asegura que están controlados os dous lumes rexistrados esta madrugada no municipio de Gondomar, que afectaron principalmente ás parroquias de Mañufe e Chaín. O sinistro en total danou aproximadamente 55 hectáreas de montes comunais. Axentes que participaron nas actividades de auxilio aseguraron a esta Redacción que os focos foron múltiples e claramente provocados al iniciarse pola madrugada en ambos os dous casos.