O alcalde de Nigrán, Efrén Juanes, foi agredido hoxe no seu despacho por unha veciña de Chandebrito que protestaba pola actividade dun bar na súa parroquia. A secretaria tivo que solicitar a intervención da policía para separar á veciña que propinou empurróns e golpes ao rexedor nigranés. Unha vez retirada por efectivos da policía local, o alcalde formalizou a denuncia na xefatura. "Vou denuncialo por respecto á institución", informou Juanes, xa reposto do incidente.

Finalmente Unión Centrista de Nigrán (UCN)  participará nas eleccións municipais baixo unha coalición coa nova forza centrista  o Centro Democrático Liberal (CDL). Se ben a lista encabezada polos concelleiros Antonio Fernández Comesaña e mais María del Rosario Valverde, está conformada integramente por membros de UCN, a alianza permitirá aos independentes de Nigrán, recibir o apoio loxístico da CDL  ademais de "apostar por este novo proxecto de gran futuro para el Valle Miñor y el Baixo Miño", segundo manifestou Fernández Comesaña. A alianza e mais a lista foron presentadas na mañá deste martes 19 de abril nos salóns do Hotel Mirarmar. Ademais dos cabezas de lista, estiveron presentes o número 3, Serafín Alonso Seijo e o número 5, José Manuel Campos Hernida por UCN, e José Palacín, presidente galego do CDL.

José Vázquez Grela, do barrio das Angustias en Nigrán, exercía como mestre en Nigrán no ano 1936. Identificado co republicanismo, loitou por levar adiante o ensino baixo os postulados renovadores e liberais da II República e co obxectivo de levar a escola aos recunchos mais afastado. O 12 de setembro de 1936 sobre as 13 horas foi executado polas forzas sublevadas logo de ser "paseado", no barrio Devesa. Unha bala na cabeza e outra no peito acabaría coa súa vida. Tiña 50 anos, estaba casado con Josefa Iglesias e tiña seis fillos.

O sábado día 16, o BNG de Nigrán convocou ós seus afiliados, simpatizantes e veciños , para presentar a súa candidatura ás eleccións municipais. A mestra e deportista Crisitina Fernández Piñeiro encabeza a lista nacionalista converténdose na primeira muller que aspira a alcaldía neste Concello.   Presentada Fernández como “unha muller capaz, valente e conciliadora, que ten experiencia política” estará acompañada por Xavier Rodríguez Fernández como número dous, o especialista en arqueoloxía Eduardo Méndez, a modista Carmen Piñeiro e a ex concelleira  de Benestar Social e Igualdade Pilar Barreiro. Unha lista que segundo manifestan dende o Bloque “está conformada por un equipo de xente responsable e preparada, con moitas ganas de traballar para acadar o Nigrán que o BNG quere para tódolos veciños e veciñas.” Os nacionalistas informan que a lista está  “constituída por mozas e mozos  que achegan a súa forza, militantes veteranos xa presentes en  candidaturas anteriores, e outros recentes  cheos de entusiasmo.”