As asociacións culturais galegas quedan sen axudas para o seu funcionamento así como para a realización de actividades e programas culturais para o ano 2011 e parte do 2012. A Orde do 5 de outubro da Consellería de Cultura e Turismo pulicada onte no DOG deixa sen efecto a convocatoria do pasado 11 de maio, que en réxime de concorrencia competitiva beneficiaba ás fundacións, asociacións e institucións culturais no desenvolvemento das súas actividades no país.

Na xuntanza deste venres pola mañá da Comisión Autonómica de Seguimento da Seca informouse que o encoro de Zamáns está ao 37,38% das súas reservas. A presa estaría en condicións de seguir subministrando auga a Vigo, Nigrán e Baiona ata o vindeiro 4 de xaneiro (84 días), de seguir na actual situación de seca, afirmou Francisco Menéndez, presidente de Augas de Galicia. Polo contraio, o alcalde de Vigo, Abel Caballero, afirmou tamén esta mañá que “queda auga para 45 días”, polo que solicitou á Xunta de Galicia unha obra de condución, que debería aprobarse xa pola vía de urxencia, desde los ríos Oitavén e Verdugo, ata a presa de Eiras.

A Comisión pola Recuperación da Memoria Histórica da Coruña impulsou os traballos de exhumación de cinco cadáveres no cemiterio de San Pedro de Grandal, concello de Vilarmaior (A Coruña) que está a realizar o Instituto de Estudos Miñoranos. A intervención arqueolóxica desenvólvense segundo os protocolos de exhumación aprobados a nivel internacional. As vítimas dos fusilamentos cuxos restos se espera atopar son  Manuel Varela, veciño de Vilamaior, asasinado o 11 de setembro de 1936; e Xosé Rodríguez Braxe, nado en Cabanas, fusilado o día 15 do mesmo mes. Dos outros tres descoñecese exactamente  a súa identidade.

En 5 anos o patrimonio cabalar ceibe da Groba quedaría nun grupo testemuñal de manterse a actual dinámica de venda de exemplares a prezos irrisorios. Logo da tempada de curros no pasado verán, os propietarios viron como as mellores eguas e poldros saín cara aos matadoiros de Portugal e outros puntos de España por menos de 40€. A clave do problema, segundo denuncia a Asociación de Cabalos do Monte da Groba, está nos custes de mantemento, agravados pola actual normativa de Xunta de Galicia que os obriga a colocar un microchip identificatorio próximo aos 30€. Por iso o colectivo convocou esta mañá a unha manifestación cabalar e a pé para o vindeiro mércores 12 de outubro no Concello de Baiona.

A partir do vindeiro martes 11 de outubro comezan unha serie de mobilizacións por parte do colectivo docente da bisbarra a prol de informar e sensibilizar sobre a afectación dos recortes da Xunta de Galicia sobre a situación do ensino na comarca. Colocación de pancartas con lemas en defensa do ensino público nos centros, concetracións con pais e nais o martes 11 de outubro e a preparación dunha concentración masiva de tódolos docentes do Val Miñor para o día 18 de outubro ás 20 horas, é parte do programa de actividades a desenvolver. A inciativa tamén contempla convocar ás ANPAS para explicar o conflito e promover plataformas conxuntas de defensa deste servizo público.

O 13% dos habitantes do Val Miñor en idade de traballar, integran os rexistros do paro ao 30 de setembro, segundo datos aportados pola Consellería de Traballo e Benestar Social da Xunta de Galicia. O concello máis golpeado é o de Gondomar onde o 14,70% da súa poboación activa está desocupada. As cifras non son mellores nos municipios veciños: Baiona alcanza o 12,06 % e Nigrán o 11, 87 %. Das 3973 persoas sen traballo, 229 máis que en agosto, 1416 están empadroadas en Gondomar, 1481 en Nigrán e 1030 en Baiona. En datos porcentuais, a suba do paro entre agosto e setembro foi dun 8,88% (84 persoas) en Baiona, 3,25% (46 persoas) en Gondomar e 7,16% en Nigrán (99 persoas). A media do incremento do paro para toda a autonomía estivo nun 7,79%.

O secretario xeral da Emigración, Santiago Camba, e o decano do Colexio de Rexistradores das Propiedade e Mercantís de España , Alfonso Candau asinaron un convenio que busca "unha administración máis áxil" que beneficie aos galegos residentes no exterior, á hora de demostrar a súa titularidade sobre bens situados no país . Dende Emigración salientaron que para moitos paisanos na diáspora, a demostración da propiedade dun ben "pode significar un alivio económico moi importante". A medida ten por finalidade facilitar os trámites administrativos a milleiros de emigrados galegos e os seus herdeiros.