O Concello de Nigrán non terá finalmente que pagar os 19.140 euros reclamados xudicialmente pola empresa ECOVIGO PUBLICIDAD, por servizos de "Estrategia de comunicación" realizados á anterior administración municipal do popular Alfredo Rodríguez Millares. O Tribunal Superior de Xustiza de Galicia desestimou o recurso de apelación presentado pola empresa e dando por firme o ditaminado nos mesmos termos polo Xulgado do Contencioso - Administrativo número 2 de Vigo, o pasado 26 de xullo de 2010. Daquela, o maxistrado Antonio Martínez Quintanar, constatou que ECOVIGO PUBLICIDAD e a  administración do ex rexedor popular Alfredo Rodríguez Millares, mantiñan unha relación irregular non formalizada, "sen expediente previo de contratación". A pesar diso, o municipio pagou entre 2004 e 2007 perto de 150.000 euros en facturas que segundo o ditame xudicial omitían a preceptiva fiscalización do gasto e o seu correspondente expediente administrativo. A irregularidade da contratación como a falla de especificación dos servizos prestados nas devanditas facturas, son a base da resolución.

O Concello de Nigrán instala un novo parque infantil en patos e renova os da Ramallosa e Praia América, cun investimento de 13.750 euros, informou o concelleiro de Parques e Xardíns Cándido Costas Fernández. O parque de Patos era unha demanda de "todo un barrio que carecía dunha instalación dedicada aos máis pequenos", sinalou Costas.

O Concello de Nigrán denuncia que a " Xunta de Galicia frena de xeito electoralista as obras de humanización do Porto de Panxón". A última adxudicación do goberno de Emilio Pérez Touriño na Xunta de Galicia para Nigrán "foi reordenación do Porto de Panxón", informan dende a Concellería de Urbanismo, e agora "sufre a paralización intencionada da Xunta de Galicia co único obxectivo de que non poida ser finalizada antes das eleccións municipais sen ter en conta o inmenso dano que se lle está a facer a economía, o turismo e a restauración de Panxón e Nigrán".

O Partido Popular non pedirá enquisas durante o transcurso da campaña electoral, "porque xa temos unha, dende hai uns 5 meses, moi favorable á candidatura do PP", sinalou Alberto Valverde, ante consulta de Valminor.info. Segundo o informado polo candidato, a devandita enquisa foi solicitada aos efectos de orientar a campaña do partido no concello, nela recóllense os aspectos favorables e os negativos que a poboación manifestaba da candidatura popular. Valverde negouse a revelar cifras, pois sinalou que as enquisas poden ter un efecto negativo na militancia, provocando unha baixa nos esforzos ante cifras boas ou desánimo cando son malas. Sen embargo, o candidato sinalou un dato que entende obxectivo, nas últimas eleccións autonómicas Feijoo recibiu más do 50% dos votos en Nigrán. O líder dos populares había manifestado na Romería celebrada a pasada fin de semana, que " no está pidiendo nada que los votantes de Nigrán no hayan hecho en las últimas tres citas electorales –nacionales, autonómicas y europeas-, ya que al actual presidente de la Xunta de Galicia le dieron más del 50% de los votos, lo que se traduce en más de 5.000 votos."