A agrupación municipal do PSOE de Nigrán non concorrerá á reunión co equipo redactor do Plan Xeral de Ordenamento Municipal (PXOM) convocada para este mércores 29 polo alcalde Alberto Valverde. Os socialistas unha vez máis esixen unha rectificación pública do Partido Popular e mais do alcalde " das súas graves acusacións do 19 de maio coas que rachou o pacto polo PXOM en Nigrán". Nesa oportunidade, a poucas horas das eleccións municipais, os populares acusaron ao entón alcalde socialista Efrén Juanes de ocultar un borrador do PXOM con fines electorais. Acusación que os socialistas rexeitaron daquela e agora reclaman unha rectificación pública "recoñecendo a clara intencionalidade e oportunismo da referida nota".

A noite do sábado saldouse coa identificación por parte dos dispositivo de seguridade de quince mozos que estaban incorrendo en "delitos de alteración da orde pública e desfeita de mobiliario urbano e colectores", segundo deu a coñecer o Concello de Nigrán. O alcalde e responsable de Seguridade e Tráfico, Alberto Valverde mostrouse moi satisfeito coa actuación da quenda de noite, un servizo que cualifica como "fundamental para devolver a normalidade nas noites dos fins de semana á contorna da Ramallosa".

.Miles de persoas elixiron Nigrán para festexar a tradicional Noite de San Xoán, coas fogueiras e atraccións organizadas polo Concello.

.No transcurso da madrugada constatáronse algunhas refregas entre grupos de mozos, tamén casos de coma etílico e unha persoa cunha ferida leve de arma branca.

.Os responsables dunha desfeita nas dunas de Gaifar foron identificados pola policía e serán emprazados o próximo luns polas autoridades.

Unha patrulla da Policía Local foi advertida na tarde de onte, pouco antes das 18.00 horas, dun incendio que se estaba producindo nun almacén da Rúa Pereira, na parroquia de San Pedro, Nigrán. O corpo de seguridade avisou ao antigo GRUMIR sobre o feito, tras comprobar que era certo. O único membro efectivo deste dispositivo de urxencias, en colaboración cos efectivos da policía local, conseguiron extinguir o incendio 40 minutos máis tarde de ser comunicado o mesmo, segundo informa o Concello de Nigrán.