A posibilidade dunha renuncia masiva dos cargos de goberno e a formación dunha lista independente está latente nesta fin de semana no Partido Popular de Gondomar. A nova de que os principais edís con cargos de goberno quedarían fóra da lista ás municipais de maio, foi interpretada como unha "puñalada a traizón" por os que "por disciplina partidaria levaron adiante a moción de censura en 2009" e agora ven como un novo grupo"que nunca estiveron nin se lles viu nestes catro anos", se "arrima" e promoven esa decisión no candidato a alcalde Fernando Guitián, afirmaron fontes da xestora local do PP Gondomar a Valminor.info.

Hoxe ás 8 da tarde, celebrarase a penúltima "cacerolada de indignación" coa que a Plataforma Veciñal MOCIÓN=CORRUPCIÓN se manifesta cada sábado primeiro de mes diante do Concello de Gondomar. A protesta "veciñal democrática contra a corrupción, a traición aos cidadáns, e as politicas que avergoñan a un pobo coa perversión que supón o transfuguismo" vai chegando ao seu fin, asegura a plataforma. Os convocantes informan que darán por cumprida a súa "actitude democrática e de loita a prol da hixiene e a rexeneración política".

Os máis de catrocentos expedientes con solicitudes de altas e baixas de empadroamento que estaban pendentes no Concello de Gondomar dende xuño de 2010, xa foron rexistradas e entregadas ao Instituto Nacional de Estadística (INE), informou a concelleira de Persoal de Gondomar, Natalia Salgueiro. O retraso foi denunciado na primeira quincena de xaneiro polo candidato a alcalde do PSOE - Gondomar, Francisco Ferreira. De feito cando o 31 de xaneiro pechaba o prazo para empadroarse nos concellos de cara ás eleccións de maio, Gondomar mantiña un importante atraso na actualización do seu padrón. Segundo a concelleira Salguerio, o devandito atraso foi subsanado e a lista completa do padrón municipal está nas oficinas do INE.

Doce minutos e dez segundos dedicaron os dezasete concelleiros de Gondomar en resolver un pleno ordinario que se realizaba: dúas semanas despois da grave denuncia de uso de información urbanística reservada, da posible irregularidade urbanística do candidato Fernando Guitián, na parroquia de Peitieiros, e da posible inhabilitación de centos de cidadáns para votar polo atraso da súa inscrición no rexistro de empadroamento. De feito, ningún destes temas que acapararon a axenda política destes primeiros meses do 2011 foron mencionados no transcurso da sesión. O tema ao que máis tempo lle dedicaron os edís foi á desafectación de material informático inútil (3 minutos con 3 segundos) e porque o BNG preguntou pola situación da empresa encargada de facer o inventario. O único acordo que deixou para os veciños de Gondomar este pleno foi a constitución da mesa local de comercio, obrigada pola nova lei que regula o sector.