O primeiro interdito de campaña en Gondomar chegou por mor das vacas e os cabalos do Val Miñor. O sábado pasado Urbano Esmerodes (PP) presidente da Entidade Local Menor de Morgadáns citou a un grupo de gandeiros e chamou á prensa para que recollese a xuntanza. O motivo da reunión foi presentar un anteproxecto dunha feira gandeira mensual e a construción dun conxunto de instalacións veterinarias no barrio de Prado no paraxe coñecido como As Moutas. O feito foi cualificado pola oposición como unha forma encuberta de facer campaña electoral polo cal O BNG e o PSOE deron conta a Xunta Electoral dos feitos. A nova lei que rexe os actos comiciais restrinxe a campaña a unhas dous semanas previas ao 22 de maio, cunha prohibición expresa aos candidatos que ocupan cargos de goberno a presentar obras ou proxectos das súas administracións con fines de publicidade.

O barrio Da Fraga na parroquia de Vincios "non dispón de suficiente tensión eléctrica cos conseguintes prexuízos para os veciños do barrio", denuncia o BNG de Gondomar. Sen embargo, Gas Natural Fenosa "cobra puntualmente por un servizo que non presta e non ten reparo en facelo sen corrixir esta situación" advirten. O Bloque fai un reclamo público para que a empresa interveña de forma urxente e resolva o problema. A formación nacionalista asegura que levará este tema ao Concello de Gondomar, á Consellería de Industria e ao propio Parlamento Galego, "pois non é de recibo que isto pase en pleno século XXI", afirman.

A dúbida sobre si os provedores do concello de Gondomar cobrarán os seus créditos quedou no aire ao rematar o pleno celebrado este xoves 31 de marzo. A pesar da resolución favorable que outorga un recoñecemento extraxudicial de crédito por 1.300.000€ a tal fin, o BNG (que votou negativamente) informou que existe un informe da Intervención que asegura que" non hai cartos para pagar estas facturas". Este informe contradí ao alcalde Martín Urgal, quen asegurou a Valminor.info o pasado venres que "hai diñeiro para pagar". Rematado o debate, Pauliño del Río (BNG) acusou "aos doce magníficos" de acumular unha débeda de 2.5 millóns de euros nas arcas da corporación.

De cotío os 12 concelleiros do goberno municipal  son recibidos a berros de ¡Ilegales! polos membros da Plataforma Moción=Corrupción. Unha teima que reitérase cada mañá as portas do Auditorio Lois Tobío os día do pleno da corporación. Mais este xoves 31 de marzo, os berros cederon ante a presenza silenciosa dos carteis sostidos ao pé do escenario polos funcionarios do Concello de Gondomar. Neles solidarizábanse coas técnicas municipais "castigadas" pola administración e reclamaban xustiza pra elas. O movemento comezou cedo, antes das 9 horas ás arredores do auditorio. A totalidade do Comité de Persoal achegouse á Nuria Lobato , Secretaria Municipal, co obxectivo de arrouparlla na primeira sesión plenaria logo da decisión municipal de afastarlla xunto á Técnica de Administración Xeral, Elena Ares Salgado, das súas funcións urbanísticas. Durante o desenvolvemento da sesión as permanentes alusións á devandita medida e o seu rexeitamento por parte dos concelleiros da oposición, recibiron os aplausos de aprobación por parte dos funcionarios presentes e tamén dos membros da Plataforma. Claro que estes logo de aplaudir os ditos do BNG,  dirixían o súa mensaxe de sempre ao goberno:  ¡ilegales!