A fiscal Natividade Gurriarán Fernández ordenou o arquivo das dilixencias á empresa Kiwi Atlántico Fincas S.L. e mais ao goberno de Oia no entendido que non hai delito “contra la ordenación del territorio”, nin cabe o “delito de daños contra el patrimonio histórico” nin trátase dun caso de desobediencia da autoridade municipal no caso da plantación de kiwis que segundo denuncia do SEPRONA destruíu un grupo de petróglifos e provocou graves danos nun xacemento arqueolóxico romano na parroquia de Burgueira, Oia.
Gonzalo Fernández de Córdoba y Narváez é oficialmente dende esta semana o novo Conde de Gondomar. A orde xudicial 3481/2010 do 22 de decembro manda expedir "sin perjuicio de tercero de mejor derecho", a Real Carta de Sucesión no título de Conde de Gondomar, de conformidade ao Real Decreto do 27 de maio de 1912.
Tras varios anos de colaboración en diversas actividades entre o Club Marítimo Marisma da Ramallosa (CMMR) e o Instituto de Estudos Miñoranos (IEM), a directiva do Club e a Xunta de Goberno do IEM acordaron a integración das dúas asociacións, polo que a partir do convenio que se asinou onte luns, 20 de decembro na Aula de Cultura "Ponte de Rosas", o CMMR pasou a constituírse como sección Marítimo-Fluvial do IEM.
O convenio de colaboración sinala que “En función da súa natureza e obxectivos, ambas entidades coinciden en desempeñar un papel de importancia en fomentar a conservación e respecto polo patrimonio miñorán, así como o coñecemento e o estudo do medio mariño en xeral, a través de actividades de investigación, divulgación e calquera outra que favoreza o mantemento e conservación das nosas costas e mares, como un ben económico e cultural.”
O conselleiro de Presidencia, Administracións Públicas e Xustiza, Alfonso Rueda, acompañado da delegada territorial da Xunta en Vigo, Lucía Molares, presentará a institucións, colectivos e axentes sociais da cidade olívica e dos municipios da área de influencia de Vigo o proxecto de Lei de creación da Área Metropolitana de Vigo. Será o vindeiro martes e ao acto están invitados tamén os alcaldes dos 14 concellos que nun primeiro momento integrarán a futura entidade supramunicipal.
Coa intención de favorecer o uso do galego nas mensaxes de felicitación de Nadal nos novos formatos e a través das tecnoloxías da información e da comunicación, a Secretaría Xeral de Política Lingüística convoca un concurso de presentacións electrónicas de Nadal.
A Dirección Xeral de Xuventude e Voluntariado vén de ampliar a duración do ‘Parlamento Xove’ na súa edición de 2011 mediante a incorporación dunha fase clasificatoria de debates provinciais na que os dous equipos con mellores puntuacións pasarán á final.
