A representación legal da Mancomunidade do Val Miñor decidiu non asinar hoxe as indemnizacións aos traballadores do GRUMIR dispostos a renunciar aos contratos de permanencia na entidade, pola decisión de catro deles de manterse por fora do acordo chegado nese senso entre a representación sindical e a administración. A pesar da presión recibida polos traballadores que querían acollerse ao acordo e a representación da Mancomunidade que ameazaba con finalmente ir a xuízo e rematar cunha indemnización menor, aos dous traballadores que en principio anunciaron a súa oposición, sumáronse dous máis có cal, a Mancomunidade entendeu que o acordo co sindicato estaba roto. No correr desta xornada os traballadores manterán unha reunión para fixar posición e está fixada unha nova reunión de conciliación para mañá no Xulgado de Vigo.

A Asociación miñorana Espazo Lectura recolleu en Lugo o Premio Fernández del Riego á difusión do ámbito editorial e cultural 2010. A súa presidenta Conchas Costas participou da gala o pasado sábado 12 de marzo na que a Asociación Galega de Editores que como tódolos anos reuniu a todos aqueles que traballan no eido da produción e edición do libro. No acto entregáronse os Premios da Edición 2010, concedidos polos propios editores.

Mobilizar a poboación para derrogar a Lei de Augas de Galicia "que abre as portas á privatización deste ben esencial" é o obxectivo da plataforma que convoca ao acto público do próximo domingo 20 de marzo ás 12 horas, na Alameda de Santiago de Compostela, anunciou a especialista Lidia Senra membro do Sindicato Labrego do Campo. Senra sinalou que a Lei transfire tódalas potestades dos organismo autonómicos a unha empresa pública pero regulada polo dereito privado, unha porta aberta a futuros intentos de capitalización privada e privatización da auga. Nunha xuntanza organizada pola plataforma SOS GROBA, na Aula de Cultura Ponte de Rosas, sede do IEM (Gondomar), Senra afirmou que a familia tipo galega pagará con esta lei unha media de 9,78€ mensuais.

A supresión dos 12 postos de traballo que tódolos anos a Mancomunidade do Val Miñor contrataba por 9 meses para cubrir o servizo GRUMIR, deixa na incerteza a seu colectivo de traballadores. Por iso, un grupo deles decidiu saír ás rúas coa intención de xuntar firmas para que a Mancomunidade “cumpra o seu compromiso coa sociedade”. O colectivo reivindica a inmediata posta en funcionamento deste servizo de primeira necesidade para a seguridade da bisbarra, coa totalidade dos postos cubertos por profesionais, única forma de garantir o servizo, aseguran. A recolección comezou onte pola mañá na feira de Sabarís. Os traballadores manifestaron o inmediato respaldo dos veciños e comerciantes da localidade que se acercaron a asinar os impresos. A totalidade dos impresos serán entregados no próximo pleno da Mancomunidade.

Hai 100 anos un grupo de mulleres obreiras reunidas en Copenhague durante a Conferencia Internacional das Mulleres Socialistas, a iniciativa da xermana Clara Zetkin, proclamaba o Día Internacional da Muller Traballadora. Definida como un día de loita polos dereitos da muller, unha centuria despois tanto dende o Estado como da Sociedade Civil mulleres e tamén homes, desenvolven durante a xornada de hoxe unha basta axenda de actividades a prol da igualdade de xénero.

Oscar Pereiro, gañador do Tour de Francia 2006, Sechu López, montañeiro, Alejandro Gómez, atleta internacional, David Gómez, decatleta internacional , son algúns dos recoñecidos deportistas que darán o seu apoio á defensa da Serra do Galiñeiro. A Plataforma desenvolverá unha nova xornada de sensibilización e debate no seu obxectivo de evitar a instalación dun parque eólico nesa xeografía emblemática das Rías Baixas. Logo da multitudinaria participación de persoas na andaina pola serra do pasado domingo 20 de febreiro e mais as xornadas en Marrucho do venres pasado en Baiona, agora toca quenda ao Centro Cultural de Valadares. Ás oito do serán do xoves 3 de marzo a plataforma presentará un vídeo cunha recreación virtual do parque eólico proxectado no Galiñeiro pola Xunta de Galicia e a continuación unha Mesa Redonda dos Deportistas.

O noso compañeiro columnista Xosé Manuel García Crego, natural de Vigo e veciño da parroquia de Priegue, en Nigrán, ven de recibir do Ministerio de Justicia , a Declaración de Reparación e Recoñecemento Persoal, expedida ao seu favor "en virtude do disposto no parágrafo 1 do artigo 4 da Ley 52/2007, de 26 de decembro (coñecida como Lei da Memoria Histórica), pola cal a democracia española honra a quen inxustamente padeceron persecución ou violencia durante a Guerra Civil e a Ditadura."