Hai 100 anos un grupo de mulleres obreiras reunidas en Copenhague durante a Conferencia Internacional das Mulleres Socialistas, a iniciativa da xermana Clara Zetkin, proclamaba o Día Internacional da Muller Traballadora. Definida como un día de loita polos dereitos da muller, unha centuria despois tanto dende o Estado como da Sociedade Civil mulleres e tamén homes, desenvolven durante a xornada de hoxe unha basta axenda de actividades a prol da igualdade de xénero.
Nos últimos días, coincidindo coa realización dos plenos municipais dos Concellos de Baiona e Nigrán, concelleiras tanto do goberno como da oposición presentaron mocións de acordo destacando a importancia e actualidade desta xornada. No caso de Baiona, a concelleira de Igualdade María de los Ángeles Silva propoñía reflexionar sobre o progreso e os avances “acadados na promoción dos dereitos das mulleres”, e ao mesmo tempo “recoñecer o traballo que aínda queda por facer”. Neste sentido, Mª de los Ángeles Silva, sinalaba que segundo datos da Unión Europea, de España e da comunidade autónoma, a participación da muller nos niveis máis elevados de responsabilidade sigue sendo aínda baixo, sobre todo no eixo da economía, as finanzas e a política. No seu informe, Silva manifesta que a pesar do aumento do nivel formativo das mulleres hai un déficit notorio da súa presenza nos postos directivos das grandes empresas. No escrito lido durante a sesión do pleno municipal, a concelleira de Igualdade tamén referiu ao desafío de evitar a reprodución dos comportamentos sexistas na sociedade, a violencia de xénero e a vulnerabilidade da muller no actual escenario económico, no que “o problema do emprego afecta a unha parte importante” das mesmas.
No Concello de Nigrán, a concelleira de Igualdade Purificación Leal foi a encargada de presentar no pleno municipal un acordo onde solicita acadar un “Pacto de compromiso e de responsabilidade ca cidadanía, para erradicar definitivamente as desigualdades entre homes e mulleres”. A proposta aprobada por unanimidade consta de dez puntos, nos que procura “Incorporar a utilización non sexista da linguaxe nas comunicacións municipais”, rexeitar o uso sexista da imaxe da muller, igualdade nas políticas de emprego e orientación profesional, desenvolver servizos socias que permitan conciliación da vida persoal e familiar das traballadoras, programas estratéxicos de promoción da igualdade de oportunidades nas empresas, fomentar a participación das mulleres nas actividades empresariais, promover a formación da muller de cara ao emprego e impulsar a loita contra a feminización da exclusión social.
Tamén, dende as filas da oposición, no caso de Nigrán, a concelleira popular María Dolores Presas abordou a necesidade de asumir que é un feito aínda sen resolver o xeito dunha sociedade machista que non remata de asumir “que las mujeres podemos ser iguales que los hombres”, afirma. A concelleira do PP dixo que gustaríalle facer un percorrido “por tantos países donde siguen estando las mujeres discriminadas por razón de género y que aún viven explotadas, humilladas y vilipendiadas”. María Dolores Presas entende que esas mulleres viven nunha “situación lamentable y que no gozan de las libertades de la mujer occidental, y es un bien que habría que exportar a esos países en dificultad.”
Dentro deste marco, o Concello de Nigrán prepara dúas mostras, unha nas Escolas Proval “Miña nai traballa”, con material gráfico aportado por nenas e nenos de educación infantil e primaria de Nigrán, que será inaugurada o próximo sábado 12 de marzo. E o luns 14 de marzo se inaugurará no salón de plenos de Nigrán a exposición “Un mar de mulleres”.