O Xornal do Val Miñor. Baiona, Nigrán, Gondomar

Este sábado 31 de maio na contorna do Concello de Gondomar terá lugar unha feira de agricultores onde o troco de sementes será o centro da actividade. As 10h de mañá  se abrirá a feira na Praza da Paradela. Ás 11 horas terá lugar a apertura da mesa de troco onde as persoas que o desexen poderán intercambiar sementes. Así ata as 14 horas onde terá lugar un xantar popular onde cada participante traerá a súa comida. As 16 horas se volven as mesas de troco de sementes para as 17 horas desenvolverse unha “mesa de sabios”. A mesma estará integrada por veciños de Gondomar e versará sobre as tarefas tradicionais do campo.

Este venres 30 de maio ás 20:30 horas será presentada a novela ilustrada O gabinete das marabillas de Arxentino da Rocha Alemparte (Xerais, 2014) no Instituto de Estudos Miñoranos. O acto contará coa presenza dos autores, Irene Pérez Pintos e Rodrigo Pérez Pintos.

Mañá, 30 de maio, os Equipos de Dinamización Lingüística do Val Miñor van celebrar unha Xornada de Xogos Populares no campo das Cercas, en Gondomar. Esta actividade comezará ás 10 da mañá, e participarán trece colexios de Nigrán, Baiona e Gondomar.

O Centro Cultural a Merced de Chaín continúa co ciclo de teatro na parroquia coa obra Paco Jones, detective privado. posta en escena  será o vindeiro sábado 31 de maio ás 21 horas no centro cultural.  Trátase dunha representación a cargo do grupo de teatro do Centro Cultura Castro Barreiro (Salceda de Caselas), que promete risas e diversión “asegurada”. Proposta axeitada para concorrer con toda a familia e con entrada gratuíta.

Xa pasaron dous anos dende que abriu as súas portas Nornas, o primeiro hostel do Val Miñor. Durante estes dous anos teñen acontecido moitas cousas entre as paredes da casa na que se localiza esta cooperativa: obradoiros, feiras, magostos, música en directo, poesía, sorteos e moitas actividades máis.

Para celebrar que seguen “con forza”  lanzan un concurso a través da páxina de facebook, no que se elixirán as mellores fotos do Val Miñor. Sinalan que optouse por esta temática non solo por ser o Val Miñor a comarca na que “vive” Nornas, senón tamén por contar con infinidade de espazos por descubrir: Galiñeiro, Monte Tetón, Monteferro, as diferentes praias e moitos máis “que agardamos coñecer da man das concursantes”, salientan.

Toda a obra de Ramón Trigo ardeu a tres semanas da inauguración. Das súas cinzas está fornecida e titulada a mostra do plástico agora exposta na Aula de Cultura Ponte de Rosas, sede do Instituto de Estudos Miñoranos en Gondomar. Unha colección de pinturas, debuxos e esculturas que falan do seu talante creativo na que se conxugan traballos que o azar salvou por estar fóra do lugar do lume e outras que son xermolo da triste experiencia.  “Cinzas”, así sen máis, quedou aberta ao público o pasado xoves 22 de maio nun acto no que o artista obsequiou aos asistentes cunha bolsiñas con restos do que non se puído ver, mais estivo alí.

O Concello de Nigrán abre inscrición para un curso con 35 prazas de manipulador de alimentos. Os interesados deberán pagar unha matrícula de 7 euros no Rexistro Municipal onde tamén deberán presentar copia do DNI para inscribirse. Hai prazo ata o vindeiro 31 de maio. Este curso conta cunha subvención parcial das arcas municipais, segundo da conta a administración pois o seu custe real é de 17 euros.

A Escola Municipal de Cerámica celebrará do 26 ao 30 de maio a vixésimo quinta edición da Semana do Raku en Nigrán, nas instalacións municipais da escola en Cotros. A escola transformarase entre as 17.00 e as 21.30 horas nun espazo de acceso libre denominado por moitos dos asistentes a anteriores edicións como un "happening cerámico".