O Xornal do Val Miñor. Baiona, Nigrán, Gondomar

O próximo domingo 15 de outubro celebrase o setenta aniversario dun dos feitos máis tráxicos da terrible represión que se iniciou co golpe de estado do 18 de xullo de 1936. Na amañecida daquel día de hai sete décadas foron vilmente asasinados:

Manuel Aballe Domínguez, Felicísimo Antonio Pérez Pérez, Elías Alejandro Gonda Alonso “O Ghonda”, Manuel Francisco Lijó Pérez “O Lijó” , Modesto Fernández Rodríguez “O Rei Chiquito”, Fidel Leyenda Rodríguez, José Rodríguez González “O Pelonio”,
Manuel Barbosa Durán “O Ferreiro do Burgo” , Generoso Valverde Iglesias.

Dende aquela o lugar é coñecido como A VOLTA DOS NOVE. As mans populares riscaron no chan, á beira da estrada, nove cruces que cultivaron a memoria durante décadas. Dende hai un ano á arbore de bronce e os loureiros ideados polo escultor Fernando Casás serven de merecida homenaxe ás víctimas da sublevación fascista.

O Instituto de Estudos Miñoranos e a libraría Libraida teñen o pracer de convidarte á tertulia literaria QUEREMOS TANTO ÓS LIBROS. 

Nesta ocasión o profesor Gonzalo Navaza achegaranos a MEMORIA DE POETA de Xosé María Álvarez Cáccamo quen tamén participará na tertulia que terá lugar o martes 3 de outubro de 2006 ás 20:30 h. na libraría Libraída de Gondomar.

Colabora: Concellería de Cultura de Gondomar

O pasado 30 de setembro celebrouse o Día Internacional da Tradución. Neste ano 2006 a Xunta de Galicia dedicou esta xornada a Lois Tobío Fernández, fillo adoptivo do Concello de Gondomar a título póstumo. Como é ben sabido don Lois Tobío dedicou moitos anos da súa vida ao estudo da documentación, nomeadamente das cartas, que conservou do Diego Sarmiento de Acuña, 1º Conde de Gondomar. O pasado 26 de novembro de 2005 tivo lugar o Pleno de Honores do Concello de Gondomar no que lle foi concedido a Lois Tobío o máximo recoñecemento público en presenza da súa filla Constanza.

Acaban de publicarse en internet os primeiros teasers do documental do director  e guionista miñorán Antonio Caeiro Rodríguez autor dos documentais "Aillados" e  "A memoria nos tempos do wolfram".
En colaboración co Instituto de Estudos Miñorán e a Comisión pola Volta dos Nove, Antonio Caeiro rodou o documental sobre os miñoráns asasinados en Baredo o 15 de Outubro de 1936.
Neste ano da memoria, Antonio Caeiro e o IEM plasmaron e estudaron respectivamente, os feitos acontencidos naquel desgraciado día no que nove homes case todos mariñeiros, foron fusilados en Baredo en represalia pola morte dun falanxista. Dende aquela data, nove cruces aparecían pintadas anonimamente no chan +++++++++ da que pasou a chamarse a Volta dos Nove . Unha cruz por cada un deles.
O documental conta principalmente cos testimonios directos dos familiares das víctimas, e ainda que atópase en fase de postproducción posiblemente conte con recreacións dos feitos desta escura páxina da historia do Val Miñor.

O Instituto de Estudos Miñoranos e a Galería de Arte Iván Morillas de Sabarís-Baiona reinician a súa programación mensual das tertulias sobre arte agrupadas baixo a denominación de A ARTE E A PALABRA. Nesta ocasión tomará a palabra sobre A PRIMEIRA ARTE GALEGA o arqueólogo e Director da Sección de Prehistoria e Arqueoloxía do Instituto de Estudos Miñoranos XOSÉ LOIS VILAR PEDREIRA, profundo coñecedor das primeiras manifestacións artísticas coñecidas no interior dos enterramentos neolíticos –mámoas- ou nas insculturas pétreas denominadas petroglifos. O acto terá lugar o martes 19 de setembro ás 20:30 h. na Galería de Arte Iván Morillas (rúa Xulián Valverde, 64, Sabarís, Baiona).

A libraría LIBRAIDA e o INSTITUTO DE ESTUDOS MIÑORANOS reinician as tertulias "QUEREMOS TANTO OS LIBROS". nesta ocasión falaremos de CONTRA MAQUIEIRO de X.L. MENDEZ FERRIN. Será o 15 de SETEMBRO ( venres ), as 20:00 H, na Librería Libraida, o libro será presentado polo xornalista, escritor e profesor da USC MANUEL OUTEIRIÑO.

En Contra Maquieiro a voz poética de X. L. Méndez Ferrín retorna con toda a súa capacidade expresiva para levar a cabo unha revisión do século XX, desde a Guerra de Cuba até o seu esmorecemento, e érguese nunha bandeira contra o capitalismo, invocando a Razón e o valor para o verso. Desde 14th Street á Pena de Anamán, pasando revista aos acontecementos dun século que entronizou a Maquieiro, o poemario estrutúrase en catro partes longas e fermosas. Premio Losada Diéguez de Creación Literaria, 2006

O mércores día 6 de setembro a travesía do Barco da Memoria chega ao seu fin en Vilagarcía de Arousa. A xornada de pecheconsistirá nun acto no propio barco ás 17.30 horas no que participarán, entre outros, a Conselleira de Cultura e Deporte, Ánxela Bugallo e o coordinador do proxecto, Dionisio Pereira.

Ás 21.00 horas no Auditorio de Vilagarcía terá lugar o acto de peche cun concerto de A Quenlla coa colaboración de Lorena Lores.

O Barco da Memoria, visitou dezaoito portos desde a súa inauguración en Cambados o pasado 17 de xullo.