Gondomar quere manter ata fin de ano aos tres auxiliares de policía local contratados o pasado mes de xullo por un período inicial de tres meses. Nese senso a Xefatura de Policía Local de Gondomar comunica que deu inicio ao respectivo trámite. Juan Carlos González Camesella, responsable do departamento de Tráfico e Seguridade Cidadá do Concello de Gondomar, informa que deste modo o número de efectivos do Concello manterá os 10 policías locais que actualmente conta o municipio

Hai veciños que levan mais dun ano na espera dunha intervención en materia de obras menores do Concello de Gondomar. Actuacións que precisan da intervención directa de maquinaria ou operarios de Vías e Obras da administración como nos casos de arranxos de camiños, cunetas e canalizacións. Esquerda Unida afirma ter constancia desta realidade así como do contrario, petitorios que chegan ao Concello e son resoltos con celeridade, e con antelación aos precedentes. Nese senso sinalan que se está ante un procedemento “caciquil e arbitrario na resolución dos problemas dos veciños”. Engaden que é “canto menos sorprendente que sexa o concelleiro correspondente, neste caso o de Vías e Obras, quen decida cando e como se solucionan cada unha das incidencias que os veciños de Gondomar notifican polo rexistro do Concello”. A formación anuncia que solicitará ao Pleno que se establezan mecanismos para garantir “a igualdade de trato e a transparencia na resolución dos problemas cotiás que afrontan ós veciños”, así como a obriga de  dar resposta por escrito ás devanditas solicitudes.

A versión de EU de como se deciden as actuacións.

O portavoz de EU, Josué Villar, sinala que este procedemento que está a utilizar a administración local, leva  consigo “que o concelleiro correspondente poida decidir a que veciños se lle arranxan os problemas de xeito inmediato, e que veciños teñen que esperar eternamente a que os seus problemas se solucionen”.

Engade que o Concello non ten un protocolo para responder por escrito que acepta ou desestima  cada solicitude concreta. Feito que si ocorre ante demandas a outros departamentos como o de Urbanismo.

“Temos constancia de casos de veciños que levan esperando máis dun ano por unha intervención do concello en materia de obras e pequenos arranxos nos activos públicos municipais, mentres que outros veciños co mesmo problema xa o teñen solucionado dende o primeiro día, e isto nos leva a sospeitar do xeito en que se priorizan as obras e reparacións no municipio”, sinala Villar.

Denuncian falla de transparencia

Engade que o concello “pasa completamente de responder ás múltiples solicitudes que os veciños fan por escrito, polo que queda constancia da solicitude no rexistro de entrada, pero non queda por escrito a contestación do concello en canto a aceptación o rexeitamento da mesma, tampouco o día que a administración pretende dar resposta os problemas plantexados”.

EU procura un novo modelo de xestión

Esquerda Unida pretende “un modelo de xestión municipal de obras transparente e en igualdade de condicións entre tódolos veciños”. E para iso esixe que toda solicitude que requira da intervención do concello neste senso “quede ordenada por orde cronolóxica nunha listaxe de obras e reparacións municipais”.

Por outra banda, para os casos “onde a solución do problema concreto supere a capacidade do concello, pensamos que o mínimo é responder ao veciño correspondente co motivo polo cal a administración local non pode solucionar ese problema concreto”.

Instan ao alcalde, e os grupos da oposición a que vía moción en pleno, procedan a “plantexar e dar resposta a tal inxustiza, e que se establezan mecanismos que garanticen a igualdade de trato e a transparencia na resolución dos problemas cotiás que afrontan ós veciños, garantizando resposta por escrito ás devanditas solicitudes”.

O BNG de Gondomar presenta unha seria de medidas ante o Concello na procura dunha xestión máis eficiente da recollida do lixo. No escrito reclámase que antes do inicio do cobro do imposto do lixo, todas as vivendas de Gondomar conten á distancia establecida como máxima, de 150 metros, con dous contedores como mínimo, un de orgánicos (contedor verde) e outro de plástico (contedor amarelo), "xa que este é precisamente o maior volume de lixo que se produce actualmente nas vivendas". Ademais o BNG esixe que a recollida sexa diaria, sistemática e que se manteñan limpos os contedores e as zonas en que se atopen.

Pechar as ventás é de momento o único que poden facer os veciños do barrio de Souto para evitar que o fedor das augas residuais inunden as casas. O escape do vertido prodúcese na propia estrada a carón das casas dende un sumidoiro. As queixas dos veciños son recollidas polo edil nacionalista, Antonio Araújo, quen reprocha ao goberno de Gondomar de mirar para outro lado cando xa fora advertido en máis de cinco ocasións desta filtración. Engade que a fuga de auga é case permanente, mais a "diferenza é que no inverno no medio das escorrentías da chuvia 'non se nota', pero agora no verán, ademais de verse ás claras o fedor é insoportable", salienta.

O Concello de Gondomar informa que vén de realizar a contratación de tres auxiliares da Policía Local "por un período de tres meses, tras o proceso selectivo correspondente". O municipio contará deste xeito cunha plantilla de dez efectivos para os meses de verán. Aínda que se adianta que en caos de necesidade os contratos poderán ser prorrogados por outros tres meses máis.

Unha antiga demanda dos maiores de Gondomar tivo este venres un final feliz. Tras anos na procura dun espazo propio onde desenvolver as súas actividades sociais o Concello de Gondomar cedeulles un espazo acondicionado a tal fin na planta baixa das vellas escolas. Coa presenza de asociados e autoridades do Concello, a Asociación Tercera Juventud, o inaugurou este venres cun encontro onde non faltaron os petiscos e albaricoques.

A Ludoteca acollerá a cativos do concello con idades comprendidas entre os 3 e 10 anos. Desenvolverase do 17 de xullo ao 15 de setembro no edificio da Unitaria de Vilaza, en horario de 09:00 a 14:30 horas de luns a venres. A programación comprende talleres, manualidades, xogos, deporte, saídas e rutas polo ámbito, con dinámicas de participación e de aprendizaxe colectiva e individual. Os interesados poderán encontrar a solicitude de inscrición no Rexistro Municipal ou descargarllos no portal web do Concello de Gondomar.

A Consellería de Medio Ambiente, Territorio e Infraestruturas, a través da Dirección Xeral de Mobilidade, vén de adxudicar unha serie de obras de mellora de accesibilidade, instalacións da terminal de autobuses de Gondomar. As mesmas consistirán no pintado dunha zona de aparcamento para persoas con mobilidade reducida, coa súa sinalización e execución de vado. Pintaranse pasos de peóns, cos correspondentes vados peonís, mellorarase a drenaxe da estación e repararanse os aseos, ademais de colocar bancos para a espera, segundo detalla un comunicado emitido este venres pola consellería.