Gondomar ten un regato que descorre por unha estrada. Polo menos así sucede nun tramo de 230 metros na versión 2014 dos planos do PXOM de Gondomar que desprazaron a canle do regato da Grova uns 500 metros ao seu paso polo núcleo rural de Borreiros. O edil non adscrito Eladio Costas tras revisar e comparar a versión 2012 da cartografía coa recentemente entregada pola empresa Eptisa, denuncia que esta desviación traza agora un "caprichoso límite de edificación" que deixa agora 11 vivendas fóra da ordenación urbanística a pesar de non atoparse ao borde de ningunha canle.

Attachments:

File
Cartografía 2012 - 2014

Un grupo de pais e nais do CEIP Souto-Donas entregaron este mediodía 4.900 sinaturas recollidas na campaña contra a utilización de bandexas plásticas nos comedores escolares. Tras o acto de entrega, mantiveron unha reunión coa concelleira Patricia Durán, responsable dos comedores escolares de Gondomar, quen comprometeuse a buscar alternativas no vindeira convocatoria de servizos de catering, comentaron os pais a VM.info . Unha posible estratexia sería premiar na licitación ás empresas que presenten outros materias substitutivos,  caso das vaixelas de vidro atemperado ou de louza.

Segundo varias axencias o corpo que apareceu troceado nun conxelador en Ponteareas podería pertencer ao narco venezolano José Jesús Isasis González, residente en Gondomar.

A Deputación de Pontevedra entregou o novo padrón que estipulará o que cada veciño de Gondomar deberá pagar por concepto da taxa do lixo. A medida forma parte do proceso de recuperación da mesma que o bipartito PP-CDL emprendeu en 2012 tras trece anos sen cobrala, cando o ex alcalde Carlos Silva a eliminara. Entre os días 12 de xuño ao 13 de setembro estará a exposición pública. O horario será de mañá, de luns a venres, de 8.30 a 14.30 horas e pola tarde, os martes e xoves, de 15.30 a 18.30 horas no Centro Neural para que cada interesado poda realizar as consultas ou reclamacións pertinentes.

A aprobación definitiva das ordenanzas fiscais, o plan económico financeiro (2014-2015) e mais a autorización da corporación para pagar máis de 100 mil euros en facturas atrasadas a provedores, foi o que conseguiu  sacar adiante o bipartito (PP-CDL) nun pleno onde enfrontaba en minoría á oposición en bloque. A ausencia por problemas de saúde do edil Pauliño del Río (non adscrito), deixou ao goberno e oposición con 8 concelleiros cada un. Polo que o voto ponderado do rexedor Fernando Guitián, inclinou a balanza a favor das iniciativas do goberno.

Un duro enfrontamento viviuse este xoves no pleno de Gondomar entre os portavoces Paco Ferreira (PSOE) e Antonio Araújo (Nacionalista non adscrito) cando o socialista afirmou que o goberno en minoría (PP-CDL) estaba a gañar as votacións grazas a unha nova ausencia do edil nacionalista Pauliño del Río a unha sesión. A resposta de Araújo foi dura e contundente e reproboulle a Ferreira a súa actitude, sabendo que del Río estaba sendo atendido nese intre por unha emerxencia médica.

Por mor dos refachos deste xoves unha rama de abundante follaxe está a obstruír a pasaxe peonil na Ponte de Rosas . O incidente está a provocar inconvenientes aos viandantes que utilizan este transitado paseo polo río Miñor que une a Paradela (centro da vila) coa zona de Campo da Feira e as parroquias de Mañufe e Vilaza. Sendo a única ponte que cruza o río a esa altura, as persoas que non atopan aviso algún cando emprenden o percorrido polo paseo deben dar a volta no medio da treboada e circunvalar pola Avenida Elduayen cara á Avenida Campo da Feira.

No que vai de ano, o Concello de Gondomar concedeu un total de 60 licenzas, entre obras maiores e menores, segundo informa o concelleiro de Urbanismo, Carlos Lameiro. O edil sinala que a validación, no ano 2012, da aplicación da reviviscencia das normas urbanísticas do plan do '91 sobre a delimitación de núcleos, "fixo posible afianzar a plena validez xurídica das licenzas que a partir de entón, e amparadas na reviviscencia das devanditas normas, concédanse aos veciños e veciñas de Gondomar".