Baiona ofrecerá a veciños e visitantes un feixe de actividades con motivo do Día do Turista, a celebrarse o vindeiro venres 22 de agosto. A primeira dará comezo ás 10 da mañá cunha visita guiada pola vila e que partirá da Oficina de Turismo. Paralelamente ás 10:30 horas no campo do Aral terá lugar un torneo de fútbol-7 . No resto da xornada terán lugar brincadeiras e obradoiros para os cativos, un paseo marítimo, a actuación de Rozalén e unha queimada na praza do concello que pechará as actividades do día.

Segundo a petición lanzada onte por Esquerda Unida, Baiona rematou en xuño co contrato privado coa empresa Espina y Delfín para o abastecemento de auga potable no municipio, un servizo que según EU debe ser remunicipalizado segundo os datos do estudo do Tribunal de Contas que sinala que o servizo é un 10% máis caro cando se presta por concesión privada, que cando a xestión é pública.

Pero as diferencias non só están nese 10% do servizo, a súa privatización esconde unha letra miuda sobre as grandes empresas que están adquirindo dereitos e fancéndose donas dun ben común de primeira necesidade que escasea e que xa foi bautizado como o "ouro azul". A agua.

O servizo público de augas de cidades e vilas do noso país estase convertendo nun negocio para as multinacionais. A única prexudicada, como sempre, a cidadanía. Ademais este tipo de concesións converteuse nun niño común para a corrupción política. PP, PSOE, CIU, UPN son partidos que avogan pola privatización dos sistemas públicos de auga. Pero cal é a situación actual?

Esquerda Unida solicita ao concello de Baiona a remunicipalización do servizo de abastecemento do auga, unha vez rematado o contrato do servizo abastecemento e saneamento de auga de Baiona, o pasado mes de xuño. O coordinador local, Silvano Montes, estima que o abastecemento de auga a cidadanía “é un dereito esencial da veciñanza, que non pode quedar en mans dunha empresa privada”.

O promotores do círculo Podemos de Baiona fixan para o 18 de agosto ás 20:00horas a súa primeira asemblea. O fan tras denunciar nun comunicado que a mesma postergouse durante un mes por mor de que o Concello de Baiona púxolles atrancos na cesión dun local. Finalmente esta mañá foron comunicados pola administración local que contarán coa sala multiusos Ánxel Bedriñana localizada no baixo da Praza de Abastos.

Con máis de medio milleiro de asistentes celebrouse na tarde-noite do mércores a tradicional Xeira do Instituto de Estudos Miñoranos coñecida como a “Noite de estrelas e lobos”.  Dende cedo o público ocupou ata encher todos os recunchos da estrada Baiona - O Rosal á altura de Chan da Lagoa. Ante a mirada estrañada das rubias e garranos que pastaban na zona, centenares de coches comezaron a trepar a estrada provincial 2205 cara ao Corteliño onde as vistas panorámicas dende o Montouto abraiaron aos participantes alén do Val Miñor e deron pé a presumir aos locais. En caravana remontaron cara á Cruz de Pau onde a fileira de lanternas alcanzou os dous quilómetros nunha apertada marcha cara o Foxo Pedriño, onde tivo lugar unha explicación e reconstrución etnográfica da caza do lobo e posteriormente unha observación astronómica.

 O percorrido contou co equipo de guías do IEM,esta vez integrado polo arqueólogo  Xosé Lois Vilar e o profesor Xilberte Manso. Tamén coa asistencia dun equipo de espertos da Agrupación Astronómica Rías Baixas liderados por Julio Pereira Navia para transportar ao público nunha viaxe imaxinaria pola ancestral Serra da Groba, e rematar coa Bágoas de San Lourenzo, entrada a madrugada do mércores.

A instalación de postos de venda ambulante na tempada alta turística sempre trae polémica co comercio establecido. Dende hai días, unha vintena de postos están a comercializar diversos produtos na franxa litoral de Baiona e dende a súa instalación veciños e comerciantes da zona están a facer sentir o seu desagrado polo que consideran "competencia desleal". O PSOE de Baiona pronunciase ao respecto e entende que é incomprensible que o Concello autorice a instalación do mercadillo "afectando letalmente os intereses do comercio local". "En Baiona non vale todo" salientan. A agrupación socialista opina que este tipo de actuacións "feitas sen ningún criterio de calidade e de idoneidade non favorecen a proxección de Baiona como un destino de calidade".

A Tesouraría Xeral da Seguridade Social, propietaria do inmoble, realiza dende este luns e por un período de tres días aproximadamente obras na Casa do Reloxo "como medida preventiva e para salvagardar a seguridade e salubridade do inmoble", segundo informa o Concello de Baiona. As devanditas actuacións foron requiridas polo Concello para levar a cabo "de forma urxente e inmediata", á espera de que realicen un estudo pormenorizado da edificación.

O primeiro susto do verán coa teima dos lumes ocorreu este sábado en Belesar. Unha leira fronte ao cemiterio local comezou arder próximo ás 15 horas. "Ninguén viu nada. Como todos estaban nas súas casas comendo..." sinalan veciños da zona. O suceso foi recollido na páxina Belesar Dixital. VM.info púxose en contacto cos administradores do espazo, quen sinalaron que "Unha veciña, que ten a casa a carón de onde se orixinou o lume foi a que chamou a garda civil. Logo no lugar apareceu a Garda Civil, Policía Local e o Grumir cun camión". A intervención controlou rapidamente o lume.