Finalmente o alcalde Jesús Almuíña pon en funcionamento o “Espacio Joven”, na planta baixa da Praza de Abasto de Baiona. A iniciativa, presentada como cumprimento dunha “promesa” electoral do seu goberno, conta con material informático, xogos de ordenador e conexión gratuíta a Internet. Ademais os usuarios disporán de mesas de billar, futbolín, dardos, consolas, xogos de mesa e outros elementos destinados a ocupar o tempo libre. Esta “promesa”, daquela, valeulle ao alcalde a suspensión dun acto coa mocidade por parte da Xunta Electoral a que entendeu que constituía unha violación da normativa por utilizar unha acción de goberno a prol dunha candidatura o que está expresamente prohibido.

O posible incremento das facturas da auga poñen en alerta a veciños e empresarios de Baiona. A redución a metade dos consumos mínimos foi anunciada esta mañá polo alcalde popular Jesús Vázquez Almuiña. A posta en marcha da Ordenanza Fiscal nº12, promovida pola administración municipal, fixa para o uso doméstico un mínimo trimestral de 30m3, uns 10m3 ao mes. No caso do uso industrial, comercial, de obra e hostaleiro pasará aos 60m3 trimestrais, 20m3 ao mes. Sendo ata de agora, de 120m3 trimestrais para comerciantes e industriais e de 195m3 para hostaleiros.

A Rúa Carabela La Pinta, no tramo comprendido entre a Rúa Cidade de Vigo e a Glorieta de Colón será, a partir de mañá, obxectivo dunha obra coa que se pretende mellorar a recollida e posterior evacuación de augas pluviais en toda esta zona, por parte do municipio.Segundo as previsións da empresa Xestión Ambiental, executora das obras, contempla un período de dúas semanas para finalizar as mesmas. Aínda que se permite a circulación pola citada rúa, co obxectivo de minimizar as molestias aos usuarios e veciños desta céntrica rúa, pídese aos condutores, de parte do Concello de Baiona, que eviten circular por este tramo, así como estacionar os vehículos.

A vila de Baiona intenta promocionar o seu perfil como destino turístico nos mercados de Suíza, Austria e Alemaña. Para iso dende onte ten convidados a tres xornalistas deses países que percorreran acompañados dun guía oficial os distintos lugares de interese do municipio. A iniciativa forma parte dun programa de visitas de familiarización (fam trips) pola costa atlántica e cantábrica para xornalistas de medios internacionais desenvolvida pola organización Villas Marineras en colaboración con España Verde, O Instituto de Turismo de España (TURESPAÑA) e as administracións autonómicas de Galicia, o Principado de Asturias, Cantabria e O País Vasco.

A Consellaría de Sanidade denuncia "pinchazos" e sabotaxe á ambulancia que debía cubrir o servizo mínimo con base na parroquia de Sabarís, Baiona, durante a folga de 24 horas desenvolvida hoxe no sector. A autoridade sanitaria a través dun comunicado público afirmou que a Fundación Pública Urxencias Sanitarias de Galicia-061 garantiu a cobertura sanitaria en toda a autonomía "lamenta os incidentes ocorridos a pasada noite durante a xornada de folga." Contrariamente, un comunicado dos traballadores nucleados na CIG, cualificou de "éxito" a xornada de folga en protesta contra os recortes no servizo de transporte sanitario urxente decretados pola Xunta, na que descartou coñecer incidentes.

Ata o vindeiro 17 de setembro están abertas as matriculacións para os cursos da Escola Municipal de Música de Baiona. Os interesados deben dirixirse ás oficinas da propia escola na Rúa Alférez Barreiro nº 20, no horario de 9 a 14 horas. Tamén pode solicitarse información ao teléfono 986 356 081.

A Consellería de Medio Ambiente, Territorio e Infraestruturas publica hoxe no Diario Oficial de Galicia (DOG) a licitación das obras da primeira fase de humanización da travesía interior de Sabarís, en Baiona. A Xunta de Galicia, a través da Secretaría Xeral de Ordenación do Territorio e Urbanismo, destinará un orzamento de máis dun millón de euros para a execución deste proxecto. Estes traballos de humanización enmárcanse dentro do Plan Hurbe.. O prazo de execución destes traballos sé de 7 meses.