Este mércores 16 de novembro ás 20 horas celebrarase un mitin do BNG no Casino de Sabarís. No acto intervirán a concelleira Ana Rodríguez e o portavoz municipal do Bloque en Baiona, Xosé Enrique Fernández. Pechará o acto o candidato por Pontevedra Xabier Toba.

O Consello da Xunta autorizou hoxe o pagamento de algo máis de 4.700 euros correspondente aos traballos do mes de setembro de rexeneración de zonas C á confraría de Baiona. A medida tamén beneficiou ás confrarías de Ferrol, Barallobre, Miño, Pontedeume, A Coruña, Raxó, Lourizán e Pontevedra (Agrupación Lonxa de Campelo).

O vindeiro venres 11, no Café Casino de Sabarís, terá lugar un acto público de Esquerda Unida ás 20:00 h. Falarán Nuria Andión (Gondomar) e José Cuevas (Nigrán), candidatos ao Congreso pola provincia de Pontevedra. O acto versará sobre a crise e as solucións alternativas que ofrece o programa desta formación política.

O desemprego en Baiona medrou un 9,32% en relación ao mes de setembro. A falla de traballo xa afecta a 1126 veciños do municipio, dos cales 587 son mulleres e 539 son homes. A crise laboral na vila real incrementouse por riba da media galega (3,96%) e equivale a case tres veces a que sufriu no seu conxunto a área metropolitana de Vigo (3,33%). Os datos oficiais da Consellería de Traballo e Benestar da Xunta de Galicia salientan o parón no sector servizos do concello, o que rexistra unha marca histórica ao chegar aos 627 casos.

A demanda e o  consumo da auga en Baiona comezará a ser monitorizado por un programa informático que controlará o Instituto Tecnolóxico de Galicia. Segundo a administración municipal, o seu obxectivo será mellorar a xestión da auga potable e dos procesos asociados coa planificación urbana. O programa, coñecido como sistema WIZ permitirá dispor aos organismos da administración local e tamén aos cidadáns, dun sistema de información accesible a través de Internet.

Durante todo este mes de outubro, circula por Madrid un autobús con promoción de Vilas Mariñeiras, asociación á que Baiona pertence, conxuntamente con municipios do Norte de España. A Concellería de Turismo baionesa informa que esta é unha das actividades contempladas no Plan de Actuacións 2011 da asociación, na cal utilízase como soporte promocional un autobús rotulado integramente, “cunha bonita creatividade, e cun slogan que resume a esencia das Vilas Mariñeiras: Un mar de sabores e experiencias”.

Se en dúas semanas non cambia o estado dos encoros de Zamáns (35,9 % de auga embalsada) e de Eiras (nun 43%), o alcalde de Vigo, Abel Caballero podería cortar o suministro a Baiona. Así o informou esta mañá aos medios, logo de sinalar que o descenso continuado no nivel dos encoros que fornecen á cidade de Vigo, poderían entrar nunha "alerta roja" no termo de dúas semáns de cumprirse as previsións de ausencia de choivas.

A Comisión de familiares "Volta dos Nove" e o Instituto de Estudos Miñoranos realizarán o próximo sábado 15 de outubro, ás 13h, unha ofrenda floral en memoria dos nove veciños do Val Miñor asasinados na noite daquela xornada de 1936 en Baredo. A homenaxe terá lugar fronte ao monumento ideado polo artista Fernando Casás instalado en 2005 para perpetuar a memoria das vítimas.