Alfonso Tellado pon a voz na campaña das emisoras municipais galegas sumándose á iniciativa "Vitaminas para o galego"
O galego necesita vitaminas. A campaña ten unha compoñente colaborativa que quere facer patente a necesidade de axudas, medios, apoio e soporte para o idioma galego. Preténdese implicar a "mass media", entidades e individuos para revitalizar o idioma e garantir a súa transmisión interxeracional.
O galego precisa moitas vitaminas. O país necesita como auga de maio contar con medios de comunicación que empreguen o idioma noso, sobre todo en contextos urbanos. Galicia precisa información de proximidade en galego. Impulsaron a iniciativa, Galicia Confidencial, Tempos Novos, Radiofusión, Praza Pública, Novas da Galiza, Quepasanacosta, ValMiñor.Info, Certo, OSil.info e Crónica 3. Sumáronse tamén á proposta, Terra Cha.Xa, Crónicas da comarca (Arzúa Melide) e Radio Nordés na Costa da Morte. Vitaminas para o galego pretende visibilizar estes medios en galego, boa parte deles de carácter comarcal, ademais de procurar vías de financiamento para a súa viabilidade e para o traballo digno dos seus profesionais.
