Concentración contra os recortes nas portas da sede do PP de Gondomar.
Unha vintena de persoas concentráronse na tardiña do venres ás portas da sede local do PP de Gondomar co xeito de protestar contra o plan de axustes que está levando adiante o goberno do popular Mariano Rajoy. "Manifestamos a nosa indignación polo que consideramos unha estafa ao pobo por parte do goberno", sinalou unha das participantes no acto. A concentración, convocada de xeito aberto por Esquerda Unida de Gondomar, rematou sen inconvenientes.
Josue Villar, portavoz de EU, salientou que a convocatoria foi de xeito espontáneo unha vez decatados dos últimos anuncios en materia de recortes socias na sesión do xoves no parlamento e o venres a través do equipo de goberno de Mariano Rajoy. Fundamentalmente a través das redes, EU quixo convocar aos veciños a concorrer "sen bandeiras" á sede local do partido de goberno.
As portas do local colocáronse carteis chamando a "folga xeral indefinida" e outros con críticas e frases irónicas contra o rescate á banca, e denunciando aos principais responsables das entidades.
