Nun dos primeiros bandos emitido como alcalde de Gondomar, o socialista Francisco Ferreira asinou o pasado martes un Bando a prol do "consumo responsable da auga". Nel fai un chamado á poboación a "facer un esforzo e restrinxir o consumo todo o que se poida". Nomeadamente solicita "evitar o rego excesivo dos xardíns, limpeza das rúas, lavado de coches, encher piscinas e outras actividades non necesarias". Todo ca fin de garantir " a dispoñibilidade de auga potable para as necesidades básicas das persoas".

Gondomar será o centro do motor en dúas rodas durante toda a fin de semana. A IV Concentración Moto Club A Cento Cien xa está en marcha e todo está listo para acoller no predio das Cercas a máis dun milleiro de visitantes segundo cálculos da organización. O evento contará cunha carpa instalada no aparcadoiro a carón do campo de fútbol, onde pincharán Dj's a partir do venres 19 ás 22 horas. O espectáculo sairá ás rúas con varias rutas na zona que percorrerán os máis de 200 inscritos nelas. A maiores a vila gozará dun singular espectáculo o sábado pola noite cun percorrido con esferas luminosas e globos de helio que se instalarán nas máquinas participantes.

Manifesto Miñor emitiu un comunicado horas despois do pleno de investidura do socialista Francisco Ferreira. Nel sinala que seguindo o mandato da súa asemblea facilitaron a investidura do alcalde coa abstención e non presentando candidato propio. Iso a pesar que o PSOE rexeitara as propostas de mínimos que Manifesto presentase días atrás na procura dun acordo, inda que segundo sinalan o grupo negociador do PSOE si as aceptara.

Non presentarán candidato propio á alcaldía de Gondomar no pleno de investidura deste sábado, e facilitarán en todo caso a de Francisco "Paco" Ferreira (PSOE), candidato máis votado nas recentes eleccións do 24M. Así o resolveu a asemblea do Manifesto Miñor tralas conversacións con socialistas e CABE na procura dun "goberno de esquerdas".

Quen será o futuro alcalde de Gondomar e con que forzas gobernará inda segue a ser obxecto de especulacións. O socialista Paco Ferreira achegou unha proposta escrita a CABE e MM cara iniciar conversacións que posibiliten a súa investidura nun goberno tripartito. Mais unhas declaracións do socialista nas que adiantaban ofrecementos de retribucións e reparto de cargos molestaron ao nacionalista Antonio Araújo (MM) por entendelas fóra de lugar neste intre das conversas. Neste contexto a asemblea do MM está convocada para a tardiña deste luns para escoitar o informe da comisión encargada de falar coas outras forzas políticas e así logo decidir a estratexia de alianzas que desenvolverá o MM.

Hoxe tivo lugar as tradicionais alfombras frorais de corpus en Gondomar. Aquí algunha escolma de imaxes desta mañá.

Ambas as dúas asembleas nomearon este sábado cadanseus equipos de contacto que responderán á solicitude de reunión que telefónicamente achegou o socialista Paco Ferreira, candidato máis votado en Gondomar no 24M. Maioritariamente os dous partidos de base veciñal valoraron positivamente a posibilidade de acadar acordos suficientes entre as tres forzas para gobernar Gondomar. Un código ético estrito e unha base programática mínima e consensuada son o marco que coincidentemente ambas as dúas formacións decidiron colocar como "irrenunciables" para calquera acordo cos socialistas. Ambas as dúas formacións descartaron iniciar conversacións para formar goberno co PP e IXG. Nun acto de transparencia, Manifesto Miñor transmitiu en directo por Internet a súa asemblea.

Vai calor, pero o voluntariado xa está a esfollar en quendas laboriosas o abasto das primeiras flores que logo serán clasificadas e almacenadas cara a confección das tradicionais alfombras de Corpus. A carpa que dende hai anos fornece o Concello na Alameda xa está enchida da ramas verdes que os equipos, maioritariamente femininos, adican varias horas a preparar debidamente. Este ano as organizadoras abriron unha páxina na rede Facebook onde comparten imaxes das xornadas e ingresan solicitudes e comentarios. Nese senso, o pedido de colaboración de man de obra voluntaria acompaña as coleccións das primeiras imaxes colocadas.