Os 17 postos da candidatura que presentará Gondomar Concello Aberto sairán dun total de 32 postulantes, en votacións telemáticas que darán comezo este 1 de abril e de xeito presencial o vindeiro 7 de abril de 9 a 21 horas. Tamén se poderá votar por correo dende o día 1 de abril. A persoa máis votada nestas primarias encabezará esta candidatura na que conflúen Esquerda Unida, ANOVA e cidadáns independentes. Como única candidata á Entidade Menor de Morgadáns se postula Pura González Martínez, profesora de Ciencias Naturais e ecoloxista.

-A Garda Civil imputou a JA.CH.P., de 45 anos de idade e veciño de Gondomar, como suposto autor dun roubo de gasoil de maquinaria estacionada na estrada de Vincios.

Os integrantes da candidatura do partido instrumental Manifesto Miñor, que concorrerá ás municipais en Gondomar co exalcalde Antonio Araúxo á cabeza, serán electos en primarias que se desenvolverán por vía telemática desde este sábado ás 10.00 ata o domingo ás 20.00 na web do Manifesto, e, de forma presencial, o domingo no centro neural de Gondomar, de 11.00 a 14.00 e de 17.00 a 20.00 horas.

Os trámites foron formalizados ante a Subdelegación de Goberno en Pontevedra onte luns. Ao mesmo tempo, a plataforma ten prevista a presentación de candidaturas para as primarias até o vindeiro 20 de marzo, e a celebración das votación o día xove 26 do corriente.

Alfredo López “Tokio”, será o número 2 na lista de 17 candidatos presentada polo BNG para as municipais do vindeiro 24 de maio. Os nacionalistas que un mes atrás decidiran levar a Mª Manuela Rodríguez Pumar como candidata á alcaldía de Gondomar, completaron a candidatura con titulares representativos de todas as parroquias do municipio. Tamén nomearon a a Eduardo García Parada como candidato do BNG á Entidade Menor de Morgadáns.

Os promotores convidan á cidadanía a participar do acto aberto que terá lugar o vindeiro venres 6 de marzo ás 20 horas no Centro Neural de Gondomar. O documento da convocatoria ven asinado polas formacións locais de Esquerda Unida (EU), ANOVA, Asinantes por unha Agrupación de Electores así como un grupo de veciños e veciñas "sen afiliación política". Salientan a necesidade de instalar unha forza de "raíz veciñal" no Concello de Gondomar, que represente "os intereses da maioría do pobo".

Os colectivos veciñais reclaman unha exposición pública do PXOM por tres meses. Demandan a apertura do documento e a "inmediata" apertura dun proceso "real" de participación veciñal onde teña cabida suxerir e achegar "inquedanzas e propostas", xa sexa a nivel colectivo como persoal. O pleno extraordinario que se celebrará este martes 3 de marzo, ás 20:00h, no Auditorio Lois Tobío de Gondomar, foi solicitado pola asemblea da Coordinadora de Entidades Veciñais de Gondomar (CEVG) e apoiado por todos os grupo políticos da oposición incluídas as que non contan con representación na corporación.

Manuela Rodríguez Pumar do BNG e Francisco “Paco” Ferreira do PSOE abren a lista de candidatos que competirán no vindeiro mes de maio por ocupar a presidencia da corporación de Gondomar. Unha abondosa militancia social e no nacionalismo antecede á candidata do Bloque. Pola súa banda, Ferreira, actual concelleiro e portavoz do PSOE, intentará acadar o carácter de rexedor facendo fincapé no seu “trabajo constante a lo largo de estos últimos cuatro años”, segundo daba a coñecer nun comunicado horas despois de ser elector por aclamación da agrupación socialista.