Esquerda Unida denuncia que desde o 1 de setembro as praias de Nigrán non contan con ningún socorristas. Advirten que as altas temperaturas manteñen a afluencia de bañistas ás praias do municipio sendo a ausencia de vixilancia un problema grave tanto para a seguridade destes como para a imaxe turística de Nigrán.

Para facilitar a rodaxe da película de ficción A praia dos afogados, o goberno de Nigrán non dubidou en trasladar un servizo social como o Roupeiro Municipal a varios quilómetros da súa sede durante varios días. Sen embargo, non amosou a mesma sensibilidade para ceder un día e durante poucas horas o Auditorio Municipal de Nigrán, para a estrea do documental A volta do 9, segundo denunciara Antonio Caeiro, director do filme neste medio. Supostamente a instalación ía estar ocupada no mes de setembro por unha ludoteca infantil. Cousa que non vai ocorrer e nin sequera estaba contemplada no calendario oficial de eventos que o concello fixo público para os meses de agosto e setembro segundo denuncia o edil e historiador socialista Juan González. Sinala o concelleiro que estase ante un novo “revés para a Cultura, en maiúsculas, do goberno de Alberto Valverde”. A película, baseada no asasinato de nove veciños do Val Miñor en mans de falanxistas en outubro de 1936, será finalmente estreada en Vigo o vindeiro 27 de setembro, como xa adiantara semanas atrás VM.info.

A Asociación Veciñal e Cultural "Chandebrito 1807" leva catro anos esperando que o Concello de Nigrán lle pague 330 euros por concepto dunha axuda para proxectos de intervención e preservación de bens culturais concedida en febreiro de 2008. O monto total era de 660 euros de fondos municipais -dos que só recibiu o 50% nese ano- e logo aducindo falla de cartos a administración non pagou máis. Concedida polo goberno bipartito PSOE-BNG, sendo alcalde Efrén Juanes, os reclamos continuaron ante a actual administración do PP, presidida por Alberto Valverde, sen obter resposta. Meses atrás a asociación recorreu aos servizos do Valedor do Pobo para que intercedera ante o Concello, mais tampouco este puido conseguir que alcaldía achegar os informes demandados para iniciar a mediación. Os veciños consideran que a actitude das autoridades de Nigrán é "bochornosa" e piden a súa dimisión do goberno municipal.
A asociación "Chandebrito 1807", que recentemente tivera que facer fronte ás desfeitas nun conxunto de xacementos de arte rupestre, ve como novamente "o silencio administrativo" é a resposta as súas preocupacións pola conservación dos bens patrimoniais da súa parroquia.

O alcalde de Nigrán admite que as laxes conmemorativas do escritor Carlos Casares foron destruídas durante a recente reforma do paseo marítimo de Panxón. Deste xeito confírmase o denunciado por VM.info o pasado mes de xuño trala advertencia de veciños da zona que sinalaron a desaparición das mesmas do espazo coñecido como “Memorial a Carlos Casares” . Mais non foi o rexedor  Alberto Valverde quen comunicara publicamente a desfeita, senón o PSOE a través dun comunicado emitido hoxe no que sinala: “Ante á pregunta do Grupo Municipal Socialista no pleno do 21 de xullo  o Alcalde confirmou a súa destrución”. Nesa mesma sesión Valverde tería afirmado que as laxes se estaban a reconstruír. Declaración que tamén tomou estado público polo escrito remitido hoxe aos medios por parte do PSOE, pois as actas dese pleno aínda non están publicadas.  A todo isto, os socialistas denuncian que a un mes desas declaracións do alcalde aínda “non hai rastro das lousas”.