O vindeiro domingo 16 de xuño as dez da mañá, voluntarios de Proxecto Ríos e da asociación ecoloxista A groba farán unha xuntanza común co fin de chamar a atención do estado dos ríos. Neste caso a intervención farase nun treito determinado do curso medio do río Zamáns entre Vilaza, Chaín e Vincios. Realizarase unha limpeza dunha zona moi concreta de alto valor ecolóxico e etnográfico que leva moitos anos maltratada con entullos e que serve, nalgúns casos, de vertedoiro incontrolado de innumerables residuos.
Convócase a veciñanza e a tódalas persoas sensibles co medio ambiente. Tódolos interesados poderán informarse desta actividade chamando o teléfono 627 27 68 16

A preocupación polo impacto ambiental da fosa séptica que se está a construír nas beiras do Río Miñor en Gondomar e as súas consecuencias para os veciños aterra no parlamento de Galicia. A deputada Eva Solla (Alternativa Galega de Esquerda) presentou unha serie de preguntas ao respecto que o goberno da Xunta deberá responder de forma oral en comisión parlamentaria. A todo isto, unha plataforma de veciños de Gondomar afectados pola obra convocan a unha concentración para este mércores 5 de xuño no Centro de Saúde ás 21 horas.

-Co título “Dous anos perdidos”, ANOVA  fai público un documento de valoración da xestión do goberno bipartito (PP-CDL) en Gondomar . O documento céntrase na xestión das concellarías de Economía e Facenda, Urbanismo, Vías e Obras e a de Medio Ambiente para concluír que “Gondomar ten un goberno municipal e un alcalde incapaces de dialogar coa sociedade  a quen se debe”, e dirixido por un PP “encerellado nas súas leas internas”.

Gondomar volveu ser fiel a unha das súas tradicións máis arraigadas, a celebración do Corpus Christi, amencendo este domingo cuberta de alfombras florais confeccionadas durante toda a noite polos propios veciños. En total foron 700, os metros cadrados cubertos por estes mantos florais.