Gondomar
O candidato popular Fernando Guitián mantén a súa intensa axenda de traballo de cara ás eleccións municipais a pesar do cisma polo que atravesa o seu partido. Baixo a premisa de que no PP segue todo igual, xuntouse a tarde do mércores 13 de abril cunha ducia dos dirixentes e militantes que decidiron permanecer no partido e arroupar ao candidato a alcalde designado por Rafael Louzán. Segundo o manifestado polo candidato a Valminor.info, a reunión tiña por obxectivo continuar os traballos na confección da lista de candidatos, a que non estaría aínda pechada. A pesar da insistencia os populares non deron a coñecer nomes. Con respecto a situación da escisión do grupo municipal e boa parte da Xestora Local, Guitián mantivo un prudente silencio ante a falla dunha comunicación oficial tanto do partido como dos implicados. Pola súa banda, a aínda portavoz municipal do PP Natalia Salgueiro, traballaba noutro local da vila na preparación da súa candidatura polo partido Centro Democrático Liberal. E a vez que aseguraba que a Guitián non ten que comunicarlle nada, sinalaba que os dirixentes provincias do PP xa están informados da situación.
O casco vello de Morgadáns está sen saneamento. Os históricos barrios de O Lago e A Pedra seguen a mandar os seus vertidos ás augas do río a pesar de que a rede pasa a 700 metros. A todo isto un proxecto aprobado hai dous anos está a durmir nos arquivos municipais de Gondomar con tódolos permisos tramitados. Os veciños recibiron tamén en 2009 a visita de Rafael Louzán que lles prometeu que en poucos días comezaban os traballos. Hoxe unha pancarta colgada do aramado do recinto de festas da parroquia denuncia o incumprimento da promesa e esixe a chegada do saneamento.
Despois das incertezas xeradas a principios de 2011 sobre o atraso no rexistro de empadroamento no Concello de Gondomar, atópase exposto ao público o Censo Electoral Ordinario que rexerá nas vindeiras eleccións municipais do día 22 de maio. A listaxe pode ser consultada na planta baixa do Concello ata o día 11 de abril inclusive. Os cidadáns poderán consultarlla e si é o caso presentar reclamacións de datos nas oficinas do Concello de 9 a 13:30 horas.
O primeiro interdito de campaña en Gondomar chegou por mor das vacas e os cabalos do Val Miñor. O sábado pasado Urbano Esmerodes (PP) presidente da Entidade Local Menor de Morgadáns citou a un grupo de gandeiros e chamou á prensa para que recollese a xuntanza. O motivo da reunión foi presentar un anteproxecto dunha feira gandeira mensual e a construción dun conxunto de instalacións veterinarias no barrio de Prado no paraxe coñecido como As Moutas. O feito foi cualificado pola oposición como unha forma encuberta de facer campaña electoral polo cal O BNG e o PSOE deron conta a Xunta Electoral dos feitos. A nova lei que rexe os actos comiciais restrinxe a campaña a unhas dous semanas previas ao 22 de maio, cunha prohibición expresa aos candidatos que ocupan cargos de goberno a presentar obras ou proxectos das súas administracións con fines de publicidade.
