A Ludoteca acollerá a cativos do concello con idades comprendidas entre os 3 e 10 anos. Desenvolverase do 17 de xullo ao 15 de setembro no edificio da Unitaria de Vilaza, en horario de 09:00 a 14:30 horas de luns a venres. A programación comprende talleres, manualidades, xogos, deporte, saídas e rutas polo ámbito, con dinámicas de participación e de aprendizaxe colectiva e individual. Os interesados poderán encontrar a solicitude de inscrición no Rexistro Municipal ou descargarllos no portal web do Concello de Gondomar.

A Consellería de Medio Ambiente, Territorio e Infraestruturas, a través da Dirección Xeral de Mobilidade, vén de adxudicar unha serie de obras de mellora de accesibilidade, instalacións da terminal de autobuses de Gondomar. As mesmas consistirán no pintado dunha zona de aparcamento para persoas con mobilidade reducida, coa súa sinalización e execución de vado. Pintaranse pasos de peóns, cos correspondentes vados peonís, mellorarase a drenaxe da estación e repararanse os aseos, ademais de colocar bancos para a espera, segundo detalla un comunicado emitido este venres pola consellería.

As relacións na interna do Partido Popular de Gondomar non son as mellores dende o inicio da xestión de Fernando Gutián ao fronte do partido e da alcaldía. Nomeadamente con quen fora seu segundo na lista, o ex tenente de Alcalde Eladio Costas Pereira así como co actual presidente da Entidade Local de Morgadáns, Urbano Esmerode Domínguez, tamén do seu partido. O primeiro abandonou o goberno en marzo de 2013 por discrepancias co rexedor e deixou ao bipartito PP-CDL en minoría no pleno. Os desecontros políticos e administrativos con Urbano Esmerode remataron en máis dunha ocasión nos xulgados. Esta mañá o xornal Faro de Vigo daba a coñecer unha nova sentenza de xustiza que obriga ao Concello de Gondomar a transferir á Entidade Local de Morgadáns o 25% dos impostos recadados na parroquia nos anos 2011 e 2012. Tras coñecerse esta última, agora Eladio Costas volve a cargar e sinala que esta é a “pinga que colma o vaso” e afirma que Guitián e o seu equipo “día a día se fan merecedores da rebaixa do 50% dos seus salarios”, como ten resolto o pleno dende setembro de 2012, medida que o goberno ata de agora non aplicou.

Veciños desta rúa, puxeron en coñecemento do Concello a existencia de cascudas nesta rúa. Unha vez comprobada a veracidade da existencia destas, realizouse unha desinfección de todas as arquetas e rexistros de ambas as dúas beirarrúas da Rúa San Bieto. O concelleiro de Medio Ambiente e Servizos, Juan Carlos González Camesella, afirma que "os traballos foron realizados por unha empresa experta en control de pragas a cal certifica a eficacia do tratamento" e engade, "o mes que vén esta empresa realizará outra inspección na zona e aplicará mais tratamento se fose necesario".