O Val Miñor fixo a súa homenaxe ao escritor de Mondoñedo, Álvaro Cunqueiro no seu Centenario. O público participante do acto desenvolvido no Auditorio Municipal de Gondomar, Lois Tobío, puido gozar dun abano de presentacións artísticas inspiradas na obra do homenaxeado. Figuras de recoñecida traxectoria cultural como as escritoras Marta Dacosta e Rexina Vega, acompañada da súa filla Sara Salceda, interpretaron poemas de Cunqueiro. Tamén tivo lugar a representación do prólogo da súa obra "O incerto Señor Don Hamlet, Príncipe de Dinamarca" a cargo da Escola Non Si? Teatro de Baiona. O acto rematou cun concerto do músico César Morán (guitarra e voz), acompañado no contrabaixo por Alfonso Morán (Real Filharmonía de Galicia) os que interpretaron versos musicalizados de Álvaro Cunqueiro. A intervención foi un adianto do libro - disco de César Morán, a piques de publicarse.

O Instituto de Estudos Miñoranos realiza traballos de captación de replicas dixitais en 3D dos petróglifos do Val Miñor que poderán ser arquivadas e reproducidas ad infinitum cunha precisión micrométrica. Esta verdadeira achega tecnolóxica - científica posibilitará aos investigadores  pescudar coas vantaxes  da tecnoloxía 3D:  hologramas a tamaño real, proxección en pantallas multitáctiles, reprodución das pezas en diversos materiais, etc.

O Instituto de Estudos Miñoranos (IEM) en colaboración coa Vicerreitoría de Extensión Cultual da Universidade de Vigo e o Concello de Gondomar organizan unha serie de actividades en conmemoración do Centenario do nacemento de Álvaro Cunqueiro. A primeira delas terá lugar o venres 16 de setembro no Auditorio Municipal Lois Tobío de Gondomar, ás 20:30h. e contará coa presenza de importantes figuras da poesía e da música, así como da representación dunha obra teatral.

O patrimonio marítimo e fluvial como recurso económico e de traballo; a historia da construción e uso das gamelas guardesas e coruxeiras ; os nomes do mar e as historias de naufraxios na costa miñorana, son algúns dos temas que formarán parte da Xornada divulgativa "A riqueza do patrimonio marítimo" a desenvolverse o vindeiro venres 16 de setembro no Centro Cultural O Torreiro de Priegue.