O alcalde de Baiona, Jesús Vázquez Almuíña defende a supresión do servizo nocturno que entre luns e xoves presta a ambulancia do 061 con base en Sabarís, previsto a partir do vindeiro 10 de setembro pola Consellaría de Sanidade. Mediante un comunicado publicado na web do Concello, o rexedor afirma que a medida contempla unha necesidade de racionalización en momentos de grave crise económica. Nembargante, no mesmo escrito Almuíña afirma que “exigirá ante quien corresponda una respuesta rápida ante la llamada de cualquier vecino que necesite el servicio de una ambulancia”.
Portos de Galicia prevé iniciar as obras de construción da estación marítima de Baiona a principios do vindeiro outono. Con este fin, o ente público está a ultimar os trámites necesarios para dar comezo aos traballos a finais do mes de setembro.
Concentración ás 12 horas nas portas do Concello de Baiona contra a diminución do servizo de ambulancia.
O sindicato da CIG vén de denunciar o recorte de cinco ambulancias do 061, que son as que se encargan de atender as urxencias, os accidentes, infartos... en toda Galiza. Recortes que afectarán a Baiona, Ponteareas, Marín, Vigo e a Mariña lucense. Xabier Aboi, da FGAMT-CIG denuncia que "esta decisión é consecuencia dos recortes anunciados pola Xunta de Galicia e plasmados no Decreto de Transporte Sanitario, que xa fora denunciado hai un ano, cando aínda estaba en fase de borrador. Uns recortes que non teñen xustificación e que terán "graves consecuencias" para a calidade e cantidade dos servizos públicos prestados polas ambulancias no noso país. "
