Este domingo 19 de outubro, ás 12:30 horas, se realizará unha sinxela homenaxe  ao redor do monumento "Volta dos Nove”.  Un ano máis, familiares, veciñas e veciños lembrarán a memoria dos nove veciños miñoranos asasinados pola represión franquista na madrugada do 15 de outubro de 1936, á altura do quilómetro 58 da estrada Baiona - Camposancos.

A homenaxe  consistirá nun momento de recollemento fronte ao monumento, obra do escultor Fernando Casás, unhas breves palabras do historiador Carlos Méixome, director do IEM, e unha ofrenda floral.

A Garda Civil foi alertada por veciños da finca de O Rosal que manifestaron o forte cheiro a marihuana que proviña do inmoble. Axentes do posto de A Guarda trasladáronse á zona e atoparon 5,7 quilos de cogollos e 32 plantas de marihuana de pequeno tamaño cuxo propietario entregou voluntariamente. Trátase do terceiro operativo en menos dun mes que a Garda Civil desenvolve na zona  no marco dun operativo de “erradicación do cultivo e venda de sustancias estupefacientes”. Os operativos levan incautadas plantacións en Nigrán, Baiona, Tui e O Rosal ata de agora.

A Garda Civil de Tui incautou 36 plantas de marihuana que arroxaron un peso de 27 quilogramos, nunha leira de Guillarei anexa á vivenda na que, o suposto dono e coidador, vive cos seus pais. Ademais destas plantas se incautaron tamén ao redor de 5 kg. de marihuana xa seca, 45 gr. de cocaína e 4 e medio de heroína así como unha báscula de precisión, pequenas bolsas plásticas para a venda da droga, útiles para o cultivo da marihuana e unha cabina secadora con circuíto extractor e un deshumificador, segundo o informado aos medios.

Gondomar queda sen FP básica, Nigrán perde unha e Baiona con dificultades para o curso 2014/2015.

No Val Miñor redúcese a oferta respecto dos Programas de Cualificación Profesional Inicial (PCPI) que existían o ano pasado, ao seren trocados por cursos de FP Básica trala posta en funcionamento da reforma educativa LOMCE. Os PCPI permitían adquirir unha cualificación profesional á vez que o Graduado en Educación Secundaria Obrigatoria a ducias de estudantes con dificultades. “Grazas a eles tes a oportunidade de continuar estudando ou incorporarche ao mundo laboral en mellores condicións” salientaba ata a aprobación da LOMCE o Ministerio de Educación de España respecto aos PCPI. Para este curso 2014/2015 desaparecen nos dos dous centros de Secundaria de Gondomar e o do CPI de Panxón. A oferta queda reducida a FP Básicas que en poucas especialidades poden cursar nas Escolas Proval (Nigrán) e o IES 1º de Marzo de Baiona que só ofrece unha modalidade.

EQUO convoca a unha asemblea aberta á cidadanía o vindeiro sábado as 18h, no Estuario da Foz, na Ramallosa, para presentar o seu  proxecto no Val Miñor. A agrupación pretende abrir un debate sobre “ás necesidades que ten o Val Miñor en cuestións de política local para que consigamos achegar ás nosas e as vosas propostas de cara a conseguir un cambio nas políticas locais”. Nese senso sinalan que sumarse ás iniciativas cidadás que xurdan en Galicia de cara a conformar unha lista unitaria para as eleccións municipais do 2015 e “que aglutinen unha maioría de partidos, asociacións e colectivos que estean afastados das políticas que estiveron a aplicar na maioría dos concellos galegos durante os últimos anos”.

Non unha, senón dúas son as casas da bisbarra que foron obxecto de proxectos de rehabilitación cas converteron en exemplos salientables para o Colexio de Arquitectos de Galicia na provincia de Pontevedra. A Casa Aguirre, no casco vello de Baiona e a casa rural localizada a carón da igrexa parroquial de Chaín obtiveron o Premio Gran de Area 2014, entre máis de 60 inicialmente propostas ao xurado. O estudo madrileño de Gabriel Carrascal Aguirre e Sergio Martín Blas, é o responsable do proxecto baionés. O estudo de Antonio Soliño Troncoso, da rehabilitación e ampliación da finca rural de Chaín. Este arquitecto gondomareño acada así a cuarta premiación consecutiva, pois xa obtivera o mesmo galardón polos proxectos “Vivenda unifamiliar para un xoven músico e parella en Saíans” (2011), “Rehabilitación e ampliación de vivenda en Donas” (2012) e “Rehabilitación de vivenda en Saíans” (2013)

O concelleiro de Parque e Xardíns de Vigo, o socialista Ángel Rivas terá que declarar como imputado no Xulgado Número 1 desta localidade. Tras saltar a noticia, o político emitiu inmediatamente un comunicado no que declara que "todo o meu traballo foi sempre cun escrupuloso respecto a lei e a decencia". 

O socialista foi o director xerente de Hormigones Valle Miñor, empresa que foi sub-contratada entre outras por Eiriña, Oresa e Secoysa, adxudicatarias de millonarias obras de huanización na cidade viguesa durante o desarrollo das obras do PlanE. 

Remata a andaina polo Val Miñor das trece crianzas saharauís que este ano conviviron con familias acolledoras de Baiona, Nigrán e Gondomar. Este sábado 6 de setembro emprenderán o voo de regreso cos levará canda as súas familias. No Sahara haberá alegría polo regreso e por esta experiencia nunha terra cuxos nomes e lugares cada vez son máis coñecidos nos campos de refuxiados de Tinduf. A SOGAP (Solidariedade Galega co Pobo Saharauí), fornecedora de Vacacións en Paz, salientou e agradeceu novamente este venres ás familias acolledoras e ao Concello de Gondomar polos seus esforzos na concreción deste programa humanitario . Á vez que manifesta o desexo de contar coa colaboración económica de Baiona e Nigrán para a edición 2015.