-Logo de reunirse con autoridades da Xunta de Galicia e por separado coas empresas Melytour e ATSA a Plataforma de usuarios do transporte público de Gondomar afirma que "desgrazadamente a solución aínda está lonxe".
As liñas de ATSA seguen sen entrar á vila de Gondomar. Os recortes de frecuencias que dende hai catro meses aplicaron Melytour e a devandita ATSA seguen en pé. Non hai servizos directos a Baiona nin ao centro de Nigrán. Os máis de 300 universitarios que viven no concello seguen sen contar cun servizo ao campus universitario. "Non é de recibo que Gondomar padeza esta situación en tempos de crise onde o transporte en bus é vital para moitas persoas", denuncian desde a Plataforma pola defensa do transporte público de Gondomar.

Desde o Concello de Gondomar infórmase de que xa está aberto o calendario do 2014 para a renovación do DNI. As persoas interesadas en obter unha cita ou consultar datas deben poñerse en contacto coa Xefatura da Policía Local no teléfono 986 389 191.

O Xulgado do Penal número 2 de Vigo condena ao ex alcalde de Gondomar, Martín Urgal e o seu 1º Tenente de Alcalde e concelleiro de Urbanismo, Alfonso De Lis a unha pena de 8 anos e 6 meses de inhabilitación especial para emprego ou cargo público por entender que cometeran un delito continuado de prevaricación urbanística.

O Concello de Gondomar achegará 3.000 euros a través dun convenio coa Sociedade Cultural de San Roque de Morgadáns co xeito de acondicionar a pista deportiva situada a carón do centro cultural do devandito barrio. O acordo foi asinado polo alcalde Fernando Guitián e mais o presidente da sociedade, Manuel Alonso, segundo deu a coñecer este martes a administración local.

Un estraño vertido de cor vermello tinguiu as augas do río Zamáns o pasado mércores sen que se coñeza ata de agora as causas do fenómeno. O feito foi captado polo cámara Pablo Banga, de Gondomar.tv quen denunciou a filtración que pode observarse no vídeo divulgado na noite deste xoves 14 de novembro.

A representante do BNG no Congreso de los Diputados afondará na perda de competencias que a reforma prevé para os concellos de menos de 20 mil habitantes.  Entre elas a posible diminución ou accesibilidade das asociacións locais para acceder a axudas e subvencións. O encontro de carácter aberto terá lugar este venres 15 de novembro ás 20:15 horas na Casa da Cultura de Gondomar. A charla será presentada por Bieito Lobariñas e  Manuela Rodríguez Pumar, responsábel local de acción municipal. 

A menos de un ano da súa reparación a estación de bombeo do barrio A Torre en Chaín presenta unha nova avaría. A pesar dos case 40 mil euros gastados no seu arranxo, a estación está vertendo augas fecais ao río e invadindo con malos cheiros a zona. Así o denuncia o grupo nacionalista ANOVA nun comunicado no que acusa ao goberno municipal de Gondomar de ignorar o problema "malia a que por alí pasa a diario o concelleiro ramo que vive a 200 metros".

-A nova regulación, xa en vigor, aumenta as zonas e horarios destinados á carga e descarga establecendo dous tipos: as zonas libres e as zonas reservadas ou restrinxidas, que so poderán ser utilizadas previa solicitude e trala correspondente autorización

O Boletín Oficial da Provincia de Pontevedra recolle no seu número de onte a modificación da Ordenanza Municipal de Carga e Descarga do Concello de Gondomar, que xa está en vigor. No novo documento enténdese por carga e descarga a realizada comercialmente por persoas que realizan as súas tarefas con “carácter profesional e mediante vehículos considerados legalmente como comerciais” quedando, deste xeito, “excluídas as cargas e descargas de carácter privado”, segundo informa o Concello.