O alcalde de Nigrán, Alberto Valverde citou aos hostaleiros do municipio co fin de analizar co sector a actual regulamentación das terrazas. Na reunión, que terá lugar o vindeiro luns ás 17 horas no Salón de Plenos do Concello, tamén se presentará a iniciativa “La mejor terraza”, unha campaña pensada de cara á futura primavera. Na xuntanza, os empresarios recibirán un folio a cumprimentar co que a administración municipal pretende actualizar a información do sector hostaleiro de Nigrán.

As nenas e nenos de Nigrán recibirán a visita dos reis de oriente este xoves 5 de xaneiro. A tarde véspera de reis dará comezo ás 15.30 horas. Os paxes reais percorrerán en tres grupos as parroquias do municipio nunha caravana de coches clásicos, para recoller as cartas das caixas de correos reais. A percorrida finalizará no Campo das Redes, en Panxón, sobre ás 17.00 horas, cando se espera a chegada dos Reis Meigos

O Instituto de Mayores y Servicios Sociales de España (IMSERSO) organiza o Programa de Termalismo Social que proporciona aos pensionistas da Seguridade Social con 60 anos cumpridos tratamentos termais a prezos reducidos en balnearios de todo o territorio nacional. Como novidade, destacan as estancias de dez e doce días de duración.

Coa actuación da escola de baile Galicia en Danza, remataron por este ano as actividades de Nigrán Xogolandia. Unha iniciativa que concentrou a máis de 1.500 persoas durante este Nadal no Pavillón de Deportes de Panxón, o que foi acondicionado para trocar o ximnasio nun gran parque infantil de máis de mil metros cadrados. Dado o éxito da convocatorio, o alcalde Alberto Valverde prometeu reiterar a experiencia no vindeiro 2012.