O Xornal do Val Miñor. Baiona, Nigrán, Gondomar

“O 2015 será un ano espectacular”. É a previsión que fai o presidente da Confederación de Empresarios de Galicia (CEG), José Manuel Fernández Alvariño. Unha previsión realmente optimista sobre a recuperación económica do país.

Tralo encontro celebrado en maio na Paradela de Gondomar, este mercado agrícola alternativo celebrarase o vindeiro sábado 11 de outubro na Alameda de Redondela. Organizado pola Rede Galega de Sementes, congregará a agricultores, artesáns e colectivos culturais dende as 10 horas da mañá. O mercado de sementes o fará unha hora máis tarde ata as 14 horas, reabrindo ás 16 ata as 19 horas. Obradoiros, xogos infantís, cine, exposicións e mesas de “intercambio de saberes” completan o programa deste XIII Encontro da Rede. En caso de choiva o encontro pasa á Feira de Gando de Redondela.

Este mércores 1 de outubro ás 20:30 horas dará inicio o Ciclo "Cine e Memoria II" organizado polo IEM no marco especial do mes onde se lembra o asasinato dos nove veciños do Val Miñor en mans da represión franquista coñecido como A Volta dos Nove. O segredo da Frouxeira (2009) de Xosé Abad será o primeiro pase do ciclo que contará cunha presentación a cargo do mestre José Antonio Viñas Arias, e a asistencia de dous protagonistas do documental, Paulino Gasalla e Julia Porto que chegarán dende O Ferrol. O evento terá lugar na Aula de Cultura Ponte de Rosas, na Avenida da Feira, nº10, baixo, Gondomar. Entrada gratuíta ata completar as prazas.

O músico Paco Nogueiras presentará mañá, 1 de outubro, ás 18:00 horas, na Casa da Lectura (Donas), o seu primeiro traballo discográfico propio, titulado “Brinca Vai!” e editado por KALANDRAKA en formato libro-cd-dvd. Con ilustracións de David Pintor e vídeos musicais gravados por José Miguel Sagüillo, “Brinca Vai!” reúne doce cancións en galego dirixidas ao público infantil e familiar. Neste concerto -co que se inaugura a nova tempada de actividades de animación á lectura de Espazo Lectura- Paco Nogueiras interpretará unha escolma deses temas, con música en directo. 

O martes 7 de outubro de 2014, ás 20.00 horas, volven as sesións mensuais do Club de Lectura Sete Vidas que se celebran na Biblioteca de Gondomar, organizadas por Espazo Lectura. O libro sobre o que se vai falar e debater é a novela A memoria da choiva (Xerais ,2013), do escritor afincado na parroquia de Peitieiros, Pedro Feijoo. Trátase da segunda novela do autor, quen, tras o éxito recibido pola súa primeira novela, Os fillos do mar, regresa cunha nova aventura, desta volta chea de versos, de sangue, de amor e de odio, pero mantendo intacta a súa máxima por bandeira: ante todo, o entretemento e o pracer de lectores e lectoras.

-O documental A Volta dos Nove de Antonio Caeiro será estreada no Val Miñor dentro do ciclo "Cine e Memoria II" organizado polo Instituto de Estudos Miñoranos.

O informe provisional do Relator da ONU, Pablo Greiff trala súa visita a Galicia en xaneiro, así como o reclamo do mesmo organismo –por 4ª vez – ao Estado español para que cumpra coas diferentes lexislacións que en materia de dereitos humanos ten asinadas, reflicten o estado marxinal na que se atopa a problemáticas das vítimas do franquismo e a impunidade dos crimes dese réxime. As xornadas provinciais de Memoria Histórica organizadas polo Instituto de Estudos Miñoranos no 2009, deixaron en evidencia que arestora emprender unha investigación na procura de información para esclarecer o acontecido así como calquera intento de desenvolver exhumacións de fosas enfronta innumerables pegas por parte das administracións públicas.

Vicente Prego (A Coruña, 1957) presentará "Calendoscopio", unha mostra plástica que abrangue unha selecta escolma da súa obra. Licenciado en Belas Artes pola Universidade de Vigo e graduado na Escola de Artes e Oficios Mestre Mateo de Santiago de Compostela, a súa traxectoria artística estivo ligada nos seus comezos á Galería Trinta de Santiago. Na actualidade os seus traballos atópanse nas coleccións de importantes institucións e museos galegos. A inauguración terá lugar este venres 26 de setembro ás 20:30 horas na Aula de Cultura Ponte de Rosas, na Avenida da Feira, nº10, baixo, Gondomar. A mostra permanecerá aberta ata o vindeiro 21 de novembro e poderá visitarse de luns a venres de 19 a 21 horas.

Chámase Anxo Rodríguez Lemos, non chega aos 20 mais coñece Baiona como poucos. Aos 15 anos recuperou máis de 1200 nomes de lugares (topónimos), a maioría deles a punto de desaparecer para sempre pois só arquivaban na memoria dos veciños máis antigos. A súa colección de postais, trípticos de cine e teatro e romances de cego do Val Miñor entre outras xoias, é digna dunha exposición pública.

Percorre bibliotecas e arquivos de toda a península na procura de documentos que lle permitan reconstruír a historia da súa gran paixón: a vella Erizana. Unha fermosa teima herdada da súa bisavoa, Aurelia Otero Prado e cultivada dende neno, agora encamiñada nas aulas de Historia da Universidade de Santiago.