O conselleiro de Presidencia, Administracións Públicas e Xustiza, Alfonso Rueda, mantivo onte un encontro cos representantes da Asociación Galega Nais e Pais Separados, que lle trasladaron a posibilidade de incluír  como prioritaria a custodia compartida en caso de ruptura da parella, un dos asuntos que é obxecto de estudo por parte dun dos grupos de traballo da Comisión de Dereito Civil. Rueda segue ca rolda de contactos para abordar a reforma da lei do dereito civil de Galicia, que deu comezo o pasado día 11 de abril co encontro coa secretaria da Muller e de Políticas de Igualdade de Comisións Obreiras, Mabel Pérez, e posteriormente o día 18 de abril, cos representantes da asociación Custodia Compartida en Galicia xa!, Jesús Orois e Alberto Díaz, que reclaman a custodia compartida coma opción preferente ante situacións de separación ou divorcio.

A Concellería de Igualdade de Nigrán organiza un obradoiro onde convoca ás mulleres a aceptar a súa sexualidade como “un feito positivo e consustancial”, orientado a “fomentar actitudes positivas, reflexivas e abertas” entorno á relación co seu corpos. A actividade ten por lema “Xogando apréndese: Sexualidade e Erótica Feminina”, sendo o segundo obradoiro destas características organizado polo Concello. O mesmo terá lugar mañá venres ás 19:30 horas no Centro Antena de Nigrán, Rúa Otero Pedrayo, 52.

O Instituto Galego de Análise e Documentación Internacional (IGADI), participará entre o próximo 26 e 29 de abril na Illa do Pensamento de San Simón (Ría de Vigo), nas xornadas “Por unha Xeopolítica Europea”, coa finalidade de formalizar a creación dunha Rede Europea de Reflexión Xeopolítica, que terá a súa sé permanente na illa de San Simón.

Está aberto o prazo de inscrición para o curso de voluntariado solicitado pola Concellaría de Xuventude e Voluntaríado de Nigrán dentro do Plan de Formación de Voluntariado Galego da Xunta de Galicia. Dirixido a tódalas persoas interesadas no tema, preferentemente persoal técnico e persoas voluntarias.