O vindeiro domingo, 14 de abril, a Fundación Galicia Verde celebra na súa sede de Leboso (Forcarei-Pontevedra) a Terceira Feira de Sementes e Plantón Ecolóxicos.
Na feira, a máis doutros produtores, estará a Rede Galega de Sementes, coa se que poderá facer troco de sementes, a maiores das propias sementes da Fundación Galicia Verde, froito do traballo do ano pasado e que foron obtidas sen utilizar ningunha substancia química de síntese, como sempre debería facerse.

A Asociación Chandebrito 1807 organiza un obradoiro de pan ecolóxico no seu local social (antiga escola de preescolar da parroquia) o sábado 11 e o domingo 12 de maio, impartido polo biólogo, investigador e permacultor César Lema, que conta cunha ampla experiencia neste eido.

A explotación de ouro que pretende sondear na parroquia de Pinzás no linde con Gondomar, o consorcio anglo-canadiano Medgold xa foi investigada a finais dos anos oitenta polo ITGE, actual IGME --Instituto Geológico y Minero de España-- nun estudo no que realizaron excavacións non autorizadas xa que incluiron parte da mina romana que alí se atopa e que aparece no Catálogo de Xacementos de Patrimonio Arqueolóxico da Xunta.

A Asociación Veciñal e Cultural "Chandebrito 1807", convoca un novo curso avanzado de cestería a cargo do mestre cesteiro Rubén Berto Covelo. O curso comezará o luns 22 de abril e se desenvolverá no seu local social, na escola de preescolar da parroquia de Chandebrito, durante oito luns consecutivos en horario de 18.30 a 21.30 horas.