Unha animada xornada social convocada polo Centro Cultural San Vicente de Mañufe medirá o talento dos veciños na elaboración de viños, doces, tortas e postais do Nadal nunha serie de concursos abertos que terán lugar este venres 6 de decembro, ás 19 horas. Para participar bastará con achegarse con algún destes produtos de elaboración propia e con gañas de pasar unha tarde divertida.

Este venres 29 de novembro ás 20:30 horas terá lugar a presentación do libro de Pepe Álvarez,Pontevedra nos anos do medo, na Aula de Cultura Ponte de Rosas (Avda. da Feira, 10, baixo, Gondomar). O acto no que contará coa presenza do autor, será presentado polo director do IEM, Carlos Méixome.

O vindeiro xoves 21 de novembro ás 20:30 horas o investigador Xoán Bernárdez Vilar presentará o seu novo libro O extraordinario mundo da Ora Marítima, na Aula de Cultura Ponte de Rosas (Avenida da Feira, 10 baixo, Gondomar). A obra, na que o Val Miñor ocupa un importante espazo,  pescuda no  poema do romano Rufio Festo Avieno (Ora Marítima), unha das fontes máis antigas sobre os pobos que habitaban o noso territorio, e que tras varios anos estudándoa o autor presentoulla como tese de doutoramento en Xeografía, Arte e Historia no ano 2011.

Máis de 40 xogos populares a partir das 16:30 horas abrirán un domingo a todo lecer na parroquia de Peitieiros. Organizado polo Centro Cultura e a Comisión de Festas o evento prevé a realización dun magosto popular a partir das 19:30 horas coa actuación do grupo de gaitas do Centro Cultural Ecos e Agarimos. As actividades terán lugar no adro da igrexa de San Miguel de Peitieiros.