O vindeiro xoves 21 de novembro ás 20:30 horas o investigador Xoán Bernárdez Vilar presentará o seu novo libro O extraordinario mundo da Ora Marítima, na Aula de Cultura Ponte de Rosas (Avenida da Feira, 10 baixo, Gondomar). A obra, na que o Val Miñor ocupa un importante espazo, pescuda no poema do romano Rufio Festo Avieno (Ora Marítima), unha das fontes máis antigas sobre os pobos que habitaban o noso territorio, e que tras varios anos estudándoa o autor presentoulla como tese de doutoramento en Xeografía, Arte e Historia no ano 2011.
Boa parte do traballo que presentará Bernárdez Vilar, refire a localizacións na xeografía da costa atlántica da toponimia mencionada en Ora Marítima, nomeadamente en lugares pertencentes á bisbarra do Val Miñor e as Rías Baixas. Nese senso, escoitaremos as explicacións do autor sobre os por que identificar a Prominencia do Aryio descrita no poema co Cabo Silleiro, ou o Monte de Venus con Monteferro, onde “o mar brúa arredor de dúas illas inhabitadas a causa da pequenez dos lugares” (Illas Estelas).
O autor
Xoán Berárdez Vilar (Marín, 1936) ten publicada unha abondosa lista de estudos e ensaios históricos. Doutorado en Xeografía, Arte e Historia, é Académico Correspondente da RAG desde o ano 2003. A súa tese de licenciatura, Antes da invención de América. As descubertas precolombinas do século XV (Univ. De Vigo-Tórculo) foi publicada en 2001. Ao se xubilar realizou o doutoramento , do que a obra a presentar é a súa tese, cuxa versión en castelán (El Mundo antiguo a través de la Ora Marítima de Rufio Festo Avieno), foi editada por Galaxia no ano 2012.
