UCN-CDL denuncia máis obras ilegais na Estrada pola Vía con "fraude á facenda local".
Antonio Fernández Comesaña, portavoz do partido Unión Centrista de Nigrán-Centro Democrático Liberal (UCN/CDL), denuncia novamente a construción de novos muros ilegais en Praia América e Panxón, con motivo das obras do carril bici na PO-325 pola Vía. O concelleiro afirma que as mesmas "incumpren gravemente os retranqueos, aliñacións e altura establecidos na regulación urbanística en vigor.
Fernández Comesaña sinala que as obras que "carecen da preceptiva licenza municipal" estanse levando a cabo con "total impunidade, ao amparo dunhas obras chafalleiras que na citada estrada realiza a Xunta de Galicia", e que por conseguinte non pagan as taxas e impostos municipais, producíndose "unha fraude á facenda local, coa complicidade do goberno, creando un agravio comparativo entre cidadáns no cumprimento da lei".
"É incomprensible que logo de reiteradas denuncias realizadas polo noso grupo -ata na pasada lexislatura-, o Concello siga permitindo o abuso que se está cometendo, vulnerando flagrantemente a lei e hipotecando o desenvolvemento futuro, sen que ata a data incoáronse expedientes de reposición da legalidade urbanística e paralizado as obras ilegalmente construídas, nin ordenando a súa derriba", manifestou o edil.
Sinala que os peches fanse en terreos de dominio público, cedidos como consecuencia de licencias urbanísticas concedidas no pasado, condicionadas ás cesións obrigatorias de terreos como sucede nas inmediacións do cruzamento de Rans en Praia América, "cuxo peche estase realizando invadindo o terreo cedido no seu día, como condición imposta na construción edificio de apartamentos".
"Ata se pode estar dando o caso que a Xunta expropie e pague terreos a particulares que xa non lles corresponden e que son de dominio público",informou Fernández Comesaña, quen lembrou que na PO-325 existen varias licenzas concedidas e con cesións de chan realizadas no pasado.
A través dun comunicado o líder da UCN/CDL insta ao alcalde Alberto Valverde, a que de forma inmediata paralice as obras ilegais e inicie expedientes de restauración da legalidade urbanística, "por infracción grave e vulneración da Lei e ordene a demolición do ilegalmente construído".
"É sorprendente ver a pasividade e tolerancia aquí demostrada que contrasta coa dilixencia na aplicación da lei noutros casos, como o vivido esta semana en Camos", opinou o concelleiro.
