Das 4.784 camas previstas a ocupar polas delegacións que participarán da Volta Ciclista a seu paso polas Rías Baixas ningunha será destinada a complexos hostaleiros do Val Miñor. O Grove, Sanxenxo, Pontevedra, Vigo, Vilanova de Arousa e Cambados repartiranse os preto a 90 mil euros que segundo a Deputación, se prevé reportarán só estas contratacións destinadas a unhas dos mil persoas.

O Boletín Oficial da Provincia de Pontevedra (BOP) publica na edición deste luns 20 de maio o anuncio da resolución da alcaldía de Nigrán pola que se convoca ao proceso de selección de oito prazas de auxiliar de policía local con carácter de persoal laboral temporal. O devandito expediente con número nº: 2013/02 ps, que pode descargarse na web oficial do Concello, outorga dez días para a presentación de solicitudes.

Corcoesto, Xinzo, A Fonsagrada, Santa Comba, Ordes, Cartelle, Terra Chá, Fragas do Eume ou a Serra do Galiñeiro. Son algúns dos concellos ou espazos que neste momento están ameazados por proxectos mineiros, en distinta fases e na procura de distintos materiais. En total hai na actualidade 520 proxectos mineiros activos, e o número vai en aumento polo renovado interese de moitas multinacionais por explotar certos minerais cun prezo crecente, pola falta de traballo que lles serve de argumento ás empresas para presentarse ante a poboación, e sobre todo pola connivencia do Goberno galego, que no seu Plan Sectorial de Actividades Extractivas permite autorizar minas en calquera lugar especialmente protexido.

Segundo a "Enquisa de condicións de vida das familias" (ECV), publicada hoxe polo Instituto Galego de Estatísticas (IGE), en base ao ano 2011, as fontes principais de ingresos nos fogares de Galicia se distribúen da seguinte maneira: 57,02% (ingresos por traballo), 40,71% (prestacións) 2,28% (rendas e outros ingresos).