Socialistas denuncian o abandono municipal do proxecto de recuperación patrimonial de Chandebrito.
O pasado decembro a Asociación Veciñal "Chandebrito 1807", reclamaba a urxente intervención do Concello de Nigrán para evitar o agravamento do declive do conxunto patrimonial. Muíños, gravados rupestres, restos castrexos e outras pezas de gran valor arqueolóxico e etnográfico eran sinalados como moi afectado pola falla mantemento e actos vandálicos. Sen embargo o goberno municipal "dá por rematado" o proxecto coa Unión Europea iniciado en 2005 que permitía o financiamento dos traballos de recuperación e posta en valor do enclave, segundo denuncia este luns o edil socialista Juan González.
O proxecto, na súa realización, "recuperaba tanto o patrimonio rupestre co tratamento dos petróglifos, como o espazo natural e etnográfico e enmárcase na liña de dinamizar esta parroquia para que ao tempo, elevar a calidade de vida dos veciños e proxectar ao exterior unha oferta alternativa ao turismo de praia", sinala González. Engade que a súa posta en marcha axudou á economía de Chandebrito e Nigrán coa chegada de turistas provenientes dos cruceiros que facían escala en Vigo.
Acusa ao equipo do alcalde popular Alberto Valverde pola "ausencia de todo tipo de actividades culturais ou turísticas" na parroquia durante este mandato. Desleixo que se agrava segundo o voceiro socialista polo "abandono total e absoluto de sendeiros, rutas, sinalizacións ou dos propios elementos etnográficos".
"Chandebrito e Nigrán perden de este xeito, e case definitivamente polo total e absoluto abandono, unha das súas sinais de identidade e bota por terra unha das maiores apostas de anteriores gobernos", salienta o edil opositor. A decisión de dar por rematado o proxecto racha coa posibilidade de revitalizalo, asegura. A súa agrupación reclama ao equipo de goberno que "sexan quen de, polo menos, limpar e manter o mellor posible este gran proxecto ata que un novo goberno tome as rendas de esta parroquia e deste concello de Nigrán"
