Un turista de nacionalidade británica falleceu onte ao mediodía en Baiona na piscina da casa onde pasaba o verán cos seus fillos, sita no Camiño da Silveira, no barrio de San Antón. T.C., de 77 años de idade, sufriu unha parada cardiorespiratoria ainda que fontes da investigación non puideron confirmar se a súa morte lle sobrepuxo dentro ou fora da piscina.

Portos de Galicia adxudicou onte ao Monterreal Club de Iates de Baiona a creación do fondeadero fronte á praia Barbeira.
O proxecto reserva un espazo xunto ao espigón para o fondeo libre de barcos de pesca que busquen abrigo. O polígono de amarres terá unha capacidade para medio centenar de embarcacións deportivas. O alcalde e dous edís acudiron co patrón maior por sorpresa á rolda de prensa.

O Instituto de Estudos Miñoranos porase en contacto con todos os familiares dos nove represaliados fusilados e enterrados na denominada “volta dos nove”, en Baiona, para solicitar a súa conformidade para a exhumación dos corpos. A asociación quere crear unha fundación para preservar a memoria e o material recollido nestes últimos anos.

Os veciños do número 5 da avenida Areas de Sabarís continúan vivindo preocupados despois do incendio ocorrido hai unha semana no apartamento dun ancián que acumulaba lixo. Tras unha longa insistencia, o Concello ordenou o pasado xoves a limpeza do piso. Nove operarios municipais traballaron durante toda a xornada para sacar centenares de quilos de desperdicios queimados, que durante os últimos días fixeron a vida insoportable a todos os inquilinos da cuarta planta do edificio.