Salvamento Marítimo atopou un cadáver na ría de Vigo que podería ser o do pescador desaparecido mentres pescaba en Nigrán, á altura de Monteferro. O corpo sen vida foi trasladado ao porto de Baiona, en espera de que as autoridades xudiciais e a súa propia familia determinen se corresponde ao pescador desaparecido. Trataríase dun home de 39 anos, residente na parroquia viguesa de Coruxo.
O cadáver foi localizado pouco despois das 18 horas ao leste das Illas Cíes por un pesqueiro. O pescador saíra onte equipado con cana cara a Monteferro por unha zona rochosa e desapareceu ás 15:00 horas.
Efectivos de Emerxencias do Val Miñor e de Salvamento Marítimo efectuaron labores de rastreo na zona e localizaron unha cana de pescar e un reloxo pertencentes ao pescador desaparecido.