Nigrán busca un protocolo de mutuo aproveitamento do tráfico de turistas con Ponte de Lima.
Nigrán quere expandir a súa oferta turística aos máis de 40 mil habitantes da vila Ponte de Lima, situada no distrito de Viana do Castelo, na rexión norte de Portugal. O alcalde Alberto Valverde trasladouse en visita oficial á cidade lusa, para reunirse con membros do goberno local, co fin de elaborar un protocolo de actuación conxunto dirixido á promoción e dinamización do turismo, a cultura, o lecer e o sector servizos entre os dous concellos.
O obxectivo da viaxe foi o establecemento de lazos de unión entre Nigrán e Ponte de Lima, sinalaron dende a alcaldía. Agregaron que trátase dunha das tres localidades de Portugal con maior número de visitas nos fins de semana. "Somos dúas localidades separadas por menos de 40 km. e cunhas ofertas turísticas, culturais e de lecer moi complementarias", explicou Valverde.
Ademais do rexedor, a comitiva estivo integrada pola concelleira de Turismo, Cultura e Deportes, Liliana Silva e o presidente do CIT Val Miñor, Darío Álvarez. A visita realizada o pasado mércores 16 de agosto, foi para Valverde máis que satisfactoria. Afirma que "a posta en marcha desta colaboración permitirá levar o nome de Nigrán a unha localidade con máis de 40.000 habitantes e unha das que recibe maior afluencia de visitas nos fins de semana de todo Portugal, un obxectivo prioritario dentro da área de turismo".
