“Alberto Valverde acusa ao anterior goberno do PSOE do atraso na remodelación da Rúa San Roque de Camos cando foi o mesmo Alberto Valverde e o PP Nigrán os que votaron en contra de urbanizar este importante vial no Pleno de 2009”, afirmou categoricamente o portavoz socialista e ex concelleiro de Urbanismo do municipio Juan González. O PSOE sae así ao cruce das manifestacións do rexedor popular que acusou ao goberno de Efrén Juanes do atraso nun ano no remate das obras.
A resposta dos socialistas baséase nas actas do Pleno da corporación de marzo de 2009, onde o grupo popular opúxose a investir parte dos fondos achegados ao municipio polo convenio de Porto de Molle, para a devandita obra. González sinala que daquela, o goberno socialista alcanzou a maioría necesaria para destinar máis de 700 mil euros "nunha obra que levaba parada máis de 20 anos e no que o PP de Nigrán e o actual Alcalde votou en contra".
"Que o Alcalde e o Presidente da Asociación de Veciños de San Pedro (en alusión ao concelleiro de Vías e Obras, José Álvarez) se acheguen á Rúa San Roque de Camos a facer seguimento das obras de urbanización parece lóxico e, aínda que sempre se posicionaron en contra da obra, tócalle recoller os froitos dun traballo do goberno anterior o que é dunha hipocrisía e desvergonza política inusual é que aproveite esa finalización das obras para insultar e acusar ao goberno socialista", sostivo nun comunicado publico, González.
O escrito agrega que despois dun ano de negociacións cos propietarios a mediados de 2010 se rematou o proxecto e iniciouse a súa licitación en outubro dese ano, sendo adxudicadas as obras en xaneiro de 2011 e comezadas en febreiro.
"Se por Alberto Valverde fora a día de hoxe a Rúa San Roque non estaría rematándose, simplemente estaría sen empezar e que agora use o seu cargo de Alcalde, que non ten ben asumido, para dedicarse a desprestixiar ao goberno Socialista demostra unha tremenda inmadurez e que o cargo de Alcalde venlle tremendamente grande", sinala o portavoz da oposición.
Juan González agrega que en breves rematarase a obra do novo edificio administrativo e Auditorio de Nigrán "despois de oporse radicalmente e denostarlo sendo oposición non nos estrañaría miralo inaugurando o edificio e o Auditorio criticando a quen conseguimos realizalo."