Sobre as 10 horas da mañá de hoxe foi retirado o corpo sen vida da tartaruga que xacía no peirao de Panxón. Coa autorización do equipo de biólogos da Xunta de Galicia que están dende onte en Nigrán, o animal foi trasladado a Ourense para estudos de laboratorio e finalmente irá á Coruña onde se complementarán as análises co fin de determinar as causas da súa morte.
Os 310 quilos de peso do animal obrigaron a utilizar grúas e equipamentos de carga acordes para realizar as manobras. A operativa estivo a cargo dun equipo privado contratado pola Xunta de Galicia para estas actividades. Segundo testemuños recollidos no lugar, a tartaruga chegou onte a Panxón nunha embarcación de pescadores da zona que a atoparon morta entre as súas redes.