EU reclama que os plenos de Nigrán volvan a desenvolverse a partir das 20 horas.
Esquerda Unida avoga pola volta ás 20 horas como inicio das sesións do pleno da corporación de Nigrán. Salientan que ese horario facilita a asistencia dos veciños moi por riba do que permite o actual ás 10 da mañá que se adoptou en xuño de 2011. Lembran que o rexedor Alberto Valverde era partidario de desenvolver os plenos a esa hora cando era oposición e que así o reflicte a acta do pleno 2 de xullo de 2007 onde o entón portavoz do PP consideraba que "é unha hora interesante para os plenos e a participación dos veciños". Nese senso, EU que carece de concelleiros en Nigrán, presentou unha solicitude á alcaldía para que se ingrese na orde do día do pleno o tratamento dunha moción a tal fin.
A iniciativa tamén inclúe o mantemento das reunións o último xoves de mes, salvo no Nadal onde sería unha semana antes e no mes de agosto pola ausencia de sesión do pleno.
"Esquerda Unida considera que a situación excepcional que vivimos no Concello, onde a mala práctica e presunta corrupción chegou a mans das xustiza, fai preciso que a cidadanía teña acceso aos plenos para que as decisións tomadas polos nosos representantes non queden esquecidas nos arquivos das actas, senón que sexan perfectamente visibles para todas as veciñas e veciños", declara o portavoz de EU José Cuevas. Engade que se ben debería ser esta unha práctica habitual, "o escurantismo ao que nos ten afeitos o actual Goberno confírelle o carácter de excepcionalidade indicado".
Adianta que Esquerda Unida trasladará esta moción a todos os grupos municipais, por si a queren asumir e presentar no pleno.
