Avenida de La República de Nigrán
"O povo é quem mais ordena" ou o que ven sendo o mesmo "o pobo é quen manda".
Iso mesmo é o que lle ocorre a esta avenida que muda de nome segundo o veciño que pase por ela e lle dea por cambiar a súa placa. Inicialmente chamada oficialmente Avda Castelao. Nos anos 90, durante o mandato do Popular Avelino Fernández muda o seu nome e pasa a chamarse "Avda. Bernárdo Vázquez" nome dun alcalde predemócrata de Nigrán.
No ano 2010, durante o goberno do PSOE, o pleno acorda volver a recuperar o nome do escritor e intelectual de Rianxo, que é o nome oficial na actualidade.
A disputa dos veciños por manter un dos nomes leva anos producindo a surrealista situación da rotura das placas da rúa, pintadas e carteis ficticios, até o día de hoxe onde aparece rebautizada cun novo nome que entra a formar parte da quiniela. A nova placa reza un "AVDA. DE LA REPUBLICA" adornada coa bandeira tricolor da II República.
