-O concelleiro Antonio Fernández Comesaña (UCN-CDL,) denuncia a construción dunha caseta de transformación realizada por Unión Fenosa, en terreos destinados a zona verde e sen licenza, en Praia América.
A caseta de transformación eléctrica carecería de licenza municipal e foi situada nun espazo público protexido polas normas subsidiarias como zona verde (V-35), na intersección da Rúa Areosa, coa Avenida Rans (Praia América). Fernández Comesaña, agrega que a obra foi realizada "ante a total pasividade do Concello, infrinxindo gravemente a normativa urbanística actualmente en vigor".
Por outra banda, o concelleiro centrista sinala que a mesma normativa obriga a soterrar as instalacións, feito que tampouco foi respectado, ao atoparse sobre rasante.
Fernández Comesaña, insta ao alcalde Alberto Valverde, a que de forma inmediata, ordene a paralización das obras realizadas, e inicie expediente de reposición da legalidade urbanística, "acordando, no seu caso, a demolición do ilegalmente construído, devolvendo o terreo ao seu estado primitivo".